Mukah - Kuching 14 Ogos, 2007

Aku sudah cuba kan membali tiket bilon dari Mukah ke Kuching seawal bulan ani untuk hari 13 Ogos, 2007, malar ja madahkan inda ada "sit". Ramai jua urang kan muleh ke Kuching ani hari Isnin? Urang sudah keraja jua hari isnin... mengapa tia sit abis hari isnin kan? Inda tah ku merati. Terpaksa tia aku membali tiket muleh hari selasa. Rupa-rupanya, hari minggu atu 12 Ogos, 2007 ada Regatta di Mukah. Patut pun ramai urang keluar dari bandar Mukah pakai kerita bejuntun-juntun. Ada pesta rupanya! Memang ramai pakai bilon jua mengkali hari isnin atu jua muleh ke Kuching. Patutpun abis tiket bilon.

Kantin Lapangan Terbang Mukah

Hari kan berangkat muleh atu, aku plan kan turun ke Airport awal. Flight ku pukul 1.25pm, jadi aku turun kan meliat di Airport pukul 12 tangahari. Sekali sampai sana, inda bejelama!!! Banar inda kah ni Airport? Atau aku salah tampat??? Kali aku ani luan kan excited meliat bilon. Kalau di Airport Kuching, memanglah urang pegi awal. Ani bandar damit cemiani, inda jua payah kan luan awal datang ani. Macam urang baru-baruan saja naik bilon ani bah...

Kaunter Check-In

Nya adi ku.. bahapa tia kediaku kan lepak awal-awal di Airport? Bukan ada jelama pun. Bah... baik tah ku me'round" bandar Mukah lagi for the last time. Check-check, sekali round seluruh bandar nganya 10 minit! Bebalik jua ku ke Airport lagi awal. Tapi kali ani, ada tia sudah jelama 2-3 urang. OK lah tu... baik tah ku turun saja. Bahapa tia ku kan round lagi. Paning saja ku kan bepusing-pusing. Baik tah teranah di Airport.

Balai Berlepas. Perlukah?

Bila ku meliat Airport Mukah ani, teringat kediaku dangan Airport lama Limbang di Bukit Mas. Yalah.. open macam atu saja. Kaunter Check-In pun macam inda ada apa-apa saja. Kantin pun macam inda saja. Urang bekeraja di Airport ani pun datang pakai seluar buntak nganya. Samalah tu dangan Airport Mukah ani. Lagi dahulu masa lagi damit, bila pegi Airport ani selalu mengayau bepusing kan menunggu bilon. Runduk saja parking bilon, belusiran tah kami mengaga kan meliat dalamnya dari dakat. Biasalaa... inda pernah naik bilon bah. Bukannya bepagar pun Airport Limbang dahulu.

Aku duduk belakang Pilot. Ani tah rupanya dalam kokpit Twin-Otter

Airport Mukah ani pun sama jua. Pukul 1.30pm, bilon pun runduk. Inda ramai jelama keluar. 6 urang nganya. Macam biasa, ada jua kanak-kanak belusir mengaga bilon atu kan meliat dari dakat. Teringat kediaku zaman ku damit dulu... hihihi. 1.45pm aku berangkat dari Mukah. Biasa lah twin-otter, FREE SITTING. Dah lah badan bagak, nasib ada sit selesa. Yang bestnya, duduk belakang pilot nyamu. 

Damit nganya bilonnya ani dari luar. Fly Asian Xpress.

Kelemahan naik bilon ani, cuma dapat membawa luggage inda labih dari 10kg. Kalau labih, bebayar tia. Nasib jua barangku ngam-ngam limit atu. Mun inda, abis jua tia usin ku. Biasa kediaku naik bilon ani, selalu kan begagar. Tapi hari ani, inda tia. Hari rupa macam kan hujan saja. Kira terer lah tu pilotnya ani. Landing saja di Airport Kuching ku liat hujan barai-barai. Menyabut hujan barai-barai ani teringat ku kan lagu kanak-kanak dulu :-

Hujan Barai-Barai

Ambok Makan Padi

Si Anu kan Belarai

Tapi Inda Jadi

Keluar bilon andang basah Airport. Labat tia mengkali hujan di sini ani. Nasib bilon runduk dulu. Mun inda begagar banar tia. Subhanallah... membari ijap tu ah..!

Dalam Limosin Airport. Baru-baruan... panjang eh!

Sampai-sampai ke Airport, ku telipon sepupu ku kan menyuruh mengambil di Airport. Tapi katanya, ia inda ada kerita. Bah, teksi tah jawapannya. Malas tah kan ku mikirkan, pegi saja tah aku ke kaunter Airport Taxi, di mintai nya kediaku RM18. Mahal jua kan ke Tabuan Heights ani?? Maka dakat nganya!!! Tiba-tiba, datang urang mengambil barang-barang ku menyuruh kediaku mengikut kedia. Sekali ku liat kerita teksi nya ani, Proton Limosin!!! Patut pun mahal!!!

Malas tah ku kan mengambil luan banyak gambar lagi. Ngaleh sudah ku ni. Malas tah ku ingau yang lain-lain atu. Kan gagas bejumpa Elisa!!!