Cantek Macam....???

Malam tadi...

Biniku : Caca cantek owh....

Elisa : Canteeek..... Macam Amoi...

Aku : Aah??? Macam siapa?

Elisa : Macam Amoi...

Banjir

Ingat ku lakat, tahun 2003, bandar Kuching teruk kana banjir. Aing sungai Sarawak malimpah tabing sampai tinggalam rumah sama kadai. Kawasan ofisku pun kan tekana jua. Panuh parit dangan aing sungai. Jeraya jem, ramai yang inda belaku turun keraja. Di Kuching ani cali bah. Asal saja hujan turun mamburut 2-3 hari (inda payah luan labat), misti tah ada yang tinggalam.

Bah, kediaku bukan kan bacerita pasal Kuching banjir subanarnya. Tapi kan becerita pasal ada dulu ku bajumpa dangan orang pangkat pakcik ku di Kuching ani. Kelurusan ku liat rumahnya atu andang banar-banar siring sungai Sarawak. Jadi kediaku betanya tah pasal cerita banjir atu.

Aku : Bah... andang siring tambing banar tah rumah biskita ani ah.

Pakcik : Awu eh. Tuuu nah perau belakang rumah kami ah (kedia manunjukkan perahu di tambing)

Aku : Wah... teruk tah rumah kita kana masa musim banjir sehari atu ah!!!

Pakcik : Inda ada eh! Rumah kami mana kana banjir. Inda masuk aing pun!!

Aku : Huh?? 

Aku pun kepaningan mamikirkan macamana rumahnya siring tambing inda kana masuki aing sungai. Inda lojik eh!! Inda jua patut pelamaing ku. Tapi kediaku inda jua puas hati, ku tanyakan jua Pakcik ku.

Aku : Bah! Kuliat rumah jiran biskita ada nampak takah aing naik arah dinding rumah dorang. Inda patut rumah kita inda tekana...

Pakcik : Banar ni... inda masuk aing atu!!

Makin tah lagi ku hairan. Rumah jirannya habis kana tinggalami aing. Rumahnya siring tambing inda tekana. Inda patut...!

Aku : Macamana rumah kita siring tambing aing inda masuk masa banjir. Inda lojik jua tu???

Pakcik : Kami tutup pintu rumah kami bah. Mana ada aing masuk!!!

Aku : @#$%&^ (Bah, tekana tah kediaku tu!!)

Sense of Common VS Sense of Humour

Batah-batah ani, Elisa, anakku pemandai tah sudah bakurapak. Macam-macam tah ceritanya. Ada saja datangnya ideanya kan bakurapak ani. Kadang-kadang, ngaleh jua kediaku sama Mamanya mangalingai kedidia atu. Ada yang bunyinya malating, malar jua cali bila dilayani.

Dua malam lapas, aku pegi ke stesen minyak kan mangisi minyak karita. Anggur ku mangisi minyak, kediaku bacarita dangan urang keraja di stesen minyak atu yang kami lagau namanya, Haji Hidup (inda pulang ku tau namanya banar). Dalam karita, Elisa dangan Biniku lain pulang caritanya.

Elisa : Sapa ya Ma?

Biniku : Ya Nenek ya (asal urang tetua, kami padahi Nini). Namanya Haji Hidup.

Elisa : Oooo... Nya sik mati?

Biniku : Huh?? (Inda tah lagi takalingai uleh Biniku soalan atu)

Palamaingku, mendangarkan kurapak anakku ani, pandai sudah kedidia ani mamikirkan sesuatu benda dengan cara "common sense". Atau yang sebanarnya, Elisa memang ada "Sense of Humour"?

Bila Sudah Basar

Masa ku damit, bapa kadang-kadang ada membawa kediaku dangan Adiku pigi ofis nya. Bukan mambuat apa pun. Kedia keraja, kediaku dangan Adiku suruhnya malukis atas keratas kajang sambil-sambil manunggu abis kerajanya. Bah.. kanak-kanak mistilah kasiokan.

Kelemarin, ku bawa anakku pigi ke ofis ku. Kali pertama tah kediaku ani mambawa Elisa ke ofis ku. Aku mambuat keraja, kedia ku suruh duduk malukis atas keratas A4 (inda jua banyak biza macam kediaku lagi damit). Alhamdulillah, inda jua ba-ulah. Teranah Elisa malukis, manulis (kununnya laa). Tapi, semanjak kelemarin jua tah, ada satu ulahnya yang baru keluar.

Baru sampai ke ofis, kediaku mambuka beg ku mangaluarkan laptop ku.

Elisa : Kenak Pa?

Aku : Papa keluar komputer Papa.

Elisa : Kenak Pa?

Aku : Pakey Papa buat kerja

Elisa : Ooo.. Papa buat kerja...

Aku mangaluarkan charger laptop ku dari beg.

Elisa : Kenak Pa?

Aku : Papa ambik charger komputer Papa.

Elisa : Kenak Pa?

Aku : Papa maok charge bateri komputer Papa. Maok abis bateri.

Elisa : Kenak Pa?

Aku : Papa maok buat kerja, mesti ada bateri...

Elisa : Oooo... Caca ada bateri di umah...

Aku : Ooo.. Papa sik tauk.

Aku baru kan menaip dokumen pakai laptop ku.

Elisa : Kenak Pa?

Aku : Papa buat kerja.

Elisa : Kenak Pa?

Aku : Papa taip pakey komputer Papa.

Aku mambuka fail kan mambaca dokumen.

Elisa : Kenak Pa?

Aku : Papa maok baca.

Elisa : Kenak Pa?

Aku : Papa maok buat kerja.

Lapas aku latak talipun abis becakap.

Elisa : Kenak Pa?

Aku : Kawan Papa telifon.

Baru lapas meeting urang dalam ofis ku.

Elisa : Kenak Pa?

Aku : Papa jumpa kawan Papa?

Elisa : Kenak Pa?

Aku : Papa maok buat kerja dengan kawan Papa.

Malam tadi, Elisa dengan Biniku (Aku tengah maliat TV).

Elisa : Kenak Ma?

Biniku : Kenak Ca?

Elisa : Kenak Ma?

Biniku : Kenak Ca?

Elisa Kenak Ma?

Biniku : Kenak Ca?

Elisa : Cukup.. Cukup... Cukup!

Pandai jua sangal anakku ah.....

Berangin!!

Semenjak Elisa sudah basar ani, pandai tia sudah kan mamilih apa kan dimakan, apa yang kedia inda mau makan. Kadang-kadang, sampai saja tampat makan, pandai tia kedia bising inda mau keluar kerita. Tepaksa tah kediaku membawa arah kadai lain makan lagi.

Malam tadi, lebih kurang pukul 7 patang lalu dalam kerita...

Aku : Ca... Maok makan nasi ayam? (kediaku teringin kan makan di SCR Batu 3)

Elisa : Cik maok makan ayam.....

Aku : Maok laaa (cuba kan mamujuk lagi)

Elisa : Caca cik maok makan nacik ayam....

Sampai di SCR tengah mangunjar parking kerita...

Elisa : Caca cik maok pegi sitok....

Aku : Best sitok makan nasi ayam....

Elisa : Cik maok pegi sitok!!!!

Pukul 8 malam lalu dalam kadai SCR Batu 3...

Aku : Best mamam nasi ayam?

Elisa : Best..!!!! (nyam nyam nyam)

Panuh mulut Elisa makan nasi ayam. Berangin!!!

Ikan Peliharaan Anak Ku.

Sejak kebelakangan ani, anakku malar saja suka minta balikan lauk peliharaan macam ikan amas. Mula-mula dulu kedia kalau pigi pasar minggu Satok, malar melangui maliat akuarium garai urang bajual lauk peliharaan ani. Banyak pulang yang murah. Tapi inda tahan nyawanya nganya laa. Mula-mula dulu, kan ku balikan, tapi ku pikir bebalik, siapa tah kan mangalingai??? Harap anakku umur 2 tahun.... aluuuum!!

Bah, start 2 bulan lapas, Mamanya mambalikan anakku lauk amas siap set dengan akuarium, makanan lauk sama anti-klorin. Semenjak dari hari atu, malar tah kediaku mengungkayahkan akuariumnya, mambari makan lauk, manukar aing sama mangalingai lauknya. Tapi setiap 2-3 hari, lauk amas anakku mesti mati. Inda tahan nyamu. Setiap kali mati, terpaksa tah kediaku pigi ke kadai mambali baru. Bibiran tia anak ku manyuruh mambali lauk lagi.

Elisa : Papa beli fish agik!

Aku : Ney fish Caca nok ariya?

Elisa : Nya dah mati...

Aku : Kenak nya mati?

Elisa : Mati kenak bunuh...!!

Aku : Huh?? (Mana inda kah kedia ani balurih idea ani???)

Sampai karang ani, sudah setiap minggu kediaku mambali lauk ani. Tapi kali ani bukan lagi lauk amas. Tiger Barb sama Green Tiger jadi pilihan ku sama Ikan Laga. Lauk-lauk ani tahan nyawanya. Akuariumnya pun sudah ku balikan yang basar siap ada pam lagi. Insyaallah kalau ada rezeki labih, kan ku balikan kedia Akuarium yang basar siap semua jenis pam, filter sama lampung sekali.

Karang ani, setiap kali muleh ofis, anakku mesti madahkan :-

Elisa : Pa... fish sik mati...

Aku : Ok.