Sunday, August 12, 2007

Vrooom... Mukah!

Bangun tidor pukul 7.30 pagi. Elisa lakat lagi kan beulit-ulit inda kan mau bangun. Kediaku terasa macam ada benda kan ku buat hari ani. Tapi apa eh? Awu aaah... kan ke Mukah janji dangan ani ku pukul 10. Bangun tah ku tarus gili-gili kan bediri, ayong sekajap macam urang palau. Kalat mata ku! Macam drunken master ku bejalan. Kersahan barat badan ani kalau tarus bangun. Bila tah ku kan ada hikmat meringankan badan ani macam cerita komik?

Dakat sudah ke simpang Sri Aman - Sarikei

Sampai ke rumah Batu 12, Elisa makan fish nugget. Parutnya ani macam black-hole saja. Baru saja ku bawa pegi makan di Batu 7. Ani makan lagi.. buleh tahan! Berangkat pukul 10.45 pagi macam atu laa. Sampai di simpang Sri Aman - Sarikei dakat 1 tengahari. Lambat sedikit pasal banyak jeraya kan kana usai. Heran ku kenapa tah kan mengusai jeraya hari ani. Hari minggu jua ni. Mana ada urang bekeraja hari minggu? Rajin jua eh???


Tempat rehat Simpang Sri Aman - Sarikei

Banyak jua aku beranti tadi. Kan bekamih dangan membali minyak kerita. Sekali di Lachau (jeraya Serian-Sri Aman). Sekali di Betong. Sekali di Jakar, Sarikei. Akhir sekali di Selangau, Sibu. Inda jua luan laju ku bawa. 120kmph nganya.


Kem Oya lapas simpang Sri Aman-Sarikei

Banyak jua gambar ku ambil masa dalam perjalanan. Banyak inda bisai pasal pakai kamera handphone ku nganya. 2 mega pixel... what do you expect?? Adi ku pun inda kan pandai mengambil gambar (aku drive). Malar begagar masa ngambil gambar. Beringgut kerita katanya.


Stesen Minyak Petronas Selangau, Sibu sebelum simpang ke Mukah

Jauh jua perjalanan ke Mukah dari Kuching ani. Hampir 8 jam driving. Inda jua ku ngaleh... macam ada power extra ja aku kalau driving jauh-jauh ani. Tapi kalau driving dalam bandar Kuching... malar tia ku sakit badan. Ani inda... power laa tu kali!


Ani tah jeraya pegi ke Mukah dari simpang Selangau. Banyak rusak, sakit badan eh!

Setakat driving dari Kuching sampai ke Miri, inda jadi masalah pulang. Yang ku malas pegi ke Mukah pakai darat ani, jeraya dari simpang Selangau ke Mukah ani tah... luan tah banyak lubangnya. Inda belaku kan driving labih 60kmph. Takut tepuruk dalam lubang kalau kan jadi hero bawa laju. Baik jua tepuruk, jangan pacah tayar. Kalau kerita ani besayap, ku terabangkan eh... inda tahan eh pakai jeraya ani. Hampir 50km jeraya inda baik. Ngaleh menukar gear (manual) menakan-nakan klaj (macam urang mengepam tayar basikal pakai pam takan batis).


Simpang Mukah-Balingian. 

Kediaku ingat lagi, lagi dahulu kami sekeluarga kalau kan muleh ke Miri dari Kuching, naik van nganya. Behimpit-himpit tah kami peradian dalam van. Berabut tampat duduk, berabut makan, berabut kan melimpang. Badan masing-masing luan tabau-tabau.. mana inda macam sadin. Inda ada air-cond lagi tu. Panas eh! Jeraya lagi dahulu lagi teruk.


Jambatan baru di Mukah.. ku rasa sebuting ani nganya yang warnanya kuning

Karang ani inda lagi besampit-sampit. Masing-masing sudah tedapat kerita. Buleh kata sebuah sorang.. masing-masing sudah bekeraja, tebali sudah kerita. Ada air-cond lagi tu. Inda tia kan komplen lagi kepanasan.

Ani tah nah kerita ku pakai ke Mukah dari Kuching. Proton Savvy adi ku. Damit nganya laa tapi muatlah kami dua duduk dapan. Belakang FULL dangan barang adi ku. Luan tah panuhnya. Inda kan nampak jelama lagi. Buleh tahan kerita ani. 1.2L tapi buleh jalan 130kmph steady lagi tu dangan sarat barang. Dapat jua lah memutong kerita-kerita lain di jeraya. Macam ada turbo kunon....

Alhamdulillah.. sampai jua lah kami dua pukul 6.30 patang tadi walaupun banyak jeraya belubang, rusak, bebatu, bepasir & belupak. Buleh tahan keritanya ani.. wii wiiiiit! Lapas check in hotel & mandi, kami pegi makan, kedangaran jua bunyi kerita bekeriut-keriut... biasalaaa... extra workload.

4 comments:

Anonymous said...

woi man..apa hal ko gamuk suda ni..kehkeh..sia mau pi kuching la tahun dapan, ko sponser aku tambang...

Anonymous said...

best juak blog u tuk. Banyak gambar n banyak cerita keep up the good work from me formely Limbang boy

HERMZZ said...

Formerly Limbang boy? hmmm... curious aku ni.

Anonymous said...

just keep on blogging my friend-formerly Limbang boy