Thursday, December 27, 2007

Forum Urang Limbang

Batah sudah aku inda menulis blog ani. Ketinggalan kediaku. Bukannya malas, nganya gagau ku batah-batah ani. Batah ku meliat internet lama-lama ani, ada tah hamba Allah ani melagau kediaku masuk resgiter di Forum Limbang ni. Bah bagus jua tu.

Lama sudah inda ke Limbang, but atleast dalam forum ani dapat jua ku bejumpa dangan urang limbang dalamnya, becerita sama-sama. Ada jua tau serba sedikit pasal cerita terkini di Limbang.

Basically, inda jua banyak kan di ceritakan, tapi ada jua nyamu cerita-cerita yang urang Limbang diam di luar Limbang inda tau. Jadi, barang siapa urang Limbang membaca blog ku ani, dijemput masuk tah sama memeriahkan lagi!

http://limbang.net/forum/

Friday, December 7, 2007

Monday, November 19, 2007

Anak Buah Baru


Balum lagi kana bari nama. Semua lakat lagi melagau kedia "Baby". Adiku beranak kemarin pagi di Normah, Kuching... beranak damit bini-bini. Mirah lakat lagi muanya masa kami mengaga.



Luan tah ramainya urang melawat "Baby". Mana inda, subalah laki adiku baru habis penggilan Al-Wida'. Turun tia semua dang-sanaknya melawat. Nininya tah yang paling luan kan begagas turun mau kan meliat cicitnya. Siok tah kali banar...!



"Baby" ani yang kesiannya, batah-batah keluar beranak, alum tia kan menyusu. Malar di tulaknya inda mau menalan. Kana X-ray tia, kana sirok tia. Last-last, pukul 4 patang cemiatu, mau jua tia minum aing susu kana buatkan nurse. Inda banyak... tapi alhamdulillah, atleast nya urang mau jua.



Dalam banyak-banyak urang siok beranak damit ani, Elisa tah paling gagau. Bibiran mulutnya madahakan mamanya menyabut nama "Baby". Luan tah bisai ulahnya kununnya kan menjaga "Baby". Abis doktor pun inda di suruhnya masuk ke bilik madahkan "No"....




Luan tah sayangnya Elisa dangan "Baby" ani, sampai nininya kan migang "Baby" pun di marahinya. "Eeeeeh...!" marahnya. Macam tah adinya... Bapupu nganya tu ah..!



"Baby" ani pun bisai jua ulahnya. Teranah inda bising. Menangis inda berapa. Tapi matanya palak-palak meliat keliling macam urang merati saja. Rambut luan tah tabalnya. Bah.. mana lagi kan ulahnya. Kami peradian pun Mama madahkan labat jua rambut. Waris...!

Wednesday, November 14, 2007

Baliun Opis

Kadang-kadang kalau ada masa lapang suka ku baliun office ku ani meliat-liat. Mengayau bah! Kelemarin masa ku baliun, macam-macam ku kejumpahan yang kediaku pun inda pernah kan meliati banar-banar. Sampat jua kediaku mengambil gambar.

Sehari ani sampai saja ke office, kediaku baliun lagi. Ada jua ku kejumpahan lagi benda-benda yang aku batah-batah ani inda luan kan peduli. Rupanya..... ada jua cemiani. Bah, biskita kan meliat? Maritah.....







Kediaku pun inda perasan yang keliling office ku ani macam-macam jenis bunga ada. Bisai rupanya... inda pengingau jua mengkali kediaku ani.

Tuesday, November 13, 2007

New blog coming...

Minta maaf eh banyak-banyak batah kediaku inda menulis apa-apa dalam blog ku ani. Alum tekareh nyamu. gagu banar ku batah-batah ani. Ada projek blog lain yang ku buat. Tapi sambilan saja laa. Bah... baru-baru ani batah sudah ku inda meliat internet ani, banyak tia sudah blog baru kana buat. Kawan ku si Eddy pun bekareh jua memuangkayahkan blog ani. Banyak tah kali free time nya tu.

Ok laa untuk starting nyamu. "The Nanu" tajuk blognya http://nunau.bambooborneo.com/

The Nanu.... bah ampiti tia..

Kediaku ani inda jua behapa nyamu. Gagau cematu saja. Ada jua membuat blog baru untuk galeri gambar Elisa. http://elisaayuni.blogspot.com 

Bah nya urang, kalau boring-boring atu, dapat jua meliat gambar nya online. Inda tah payah kan di bawa kesana kemari album gambarnya.

Elisa's Gallery

Bah.. muleh tah ku dulu...

Friday, October 26, 2007

Taman Sahabat

Bisai Taman Sahabat ani waktu malam...

Elisa memang suka dibawa mengayau. Bawa saja ke mana-mana, minat banar kedia atu nyamu. Aku pun suka jua kan membawa Elisa ani. Asal menyanggupi mengipak. Tapi ada satu tampat Elisa minat banar dari dulu. Taman Sahabat di Tabuan Heights.


Sampai karang ani aku pun inda tau patung apa ni?

Setiap kali ku bawa Elisa mengayau kemari ani, kan balusir saja tia. Ya tah ku malas kan mambawa Elisa waktu siang. Mirah padam tia mua nya kerasangan. Malam tadi ku bawa Elisa kemari lagi. Siok ya meliat aing pancut-pancutan. "Buah tia..!!" katanya bila aing memancut. "Kujut...!" katanya madahakn takajut.


Wah..! Juuut..... (Takajut kata Elisa meliat aing pancutan)

Ahir sudah kami sampai di sini. Inda ramai jelama. Mana inda, pukul 9 lalu sudah. Kalau awal sedikit, bejurit urang di sini ani kan melawat sambil kan barehat. Ramai yang datang kemari ani kan begambar. Kediaku andang selalu kemari menggambar. Tapi banyak inda bisai. Kali ani aku ambil bisai-bisai sadikit... ada jua kan diala-alakan.


Teranah anak-beranak meliat pancutan

Mula-mula Elisa teranah saja melangui meliat aing pancutan. Bila sudah enjin panas, mula tia madam. Payah pulang kan mangalingai. Tapi siok jua kami anak-beranak mengayau camiani. Siok meliati Elisa madam...


Elisa dangan Usu Fizal

Malam tadi, Elisa terlabih madam. Balusir ke kiri, balusir ke kanan, balusir ke dapan, balusir kebalakang. Inda mau teranah. Siok banar pelamaing ku. Di rumah inda ada tampat kan dilusirinya. Di sini, luas, rata dangan basar. Inda panas jua. Atu tia balusiran macam kana uyung kuyok.


Mengelingai Elisa mutah. Luan madam.

Bah, kanak-kanak damit ani kalau sudah madam, ayung tia. Elisa kengalehan membawai badan baratnya, sampai mutah. Nah... beranti tah tu. Muleh tah saja kami. Inda tah Elisa tasurong lagi tu. Muleh tidur saja tah....

Thursday, October 11, 2007

Berusah Hari Raya


Ketupat = Lambang Hari Raya

Setiap kali kan raya, banyak macam tia kan di kerajakan. Mencari barang-barang kan membuat kuih.. kan membuat biskut... eh.. macam-macam lagi kan diungkayahkan. Tapi siok pulang banar. Tapi bila sudah jadi urang tetua ani, inda jua lagi kesiokan. Kanak-kanak siok pulang tu.


Rendang Daging = Makanan ruji Hari Raya

Bila hari sudah dakat banar kan raya ani, makin banyak tia kan di bali. Kan mengunjar daun tia, mengunjar kari, daging, ayam, santan, rampah... macam-macam eh. Kan ku tuliskan di sini, inda jua urang gagau kan membaca list kediaku ani.


Kelupis = Makanan ruji Hari Raya Pertama di Limbang

Selagi ku damit dulu, kalau kan Hari Raya ani, barang masakan ani sudah tia kana sediakan. Tapi piasau balum kana bukai, balum kana parut, rampah sedia balum di giling. Daun di susun balum bekarat. Ayam pun balum baputong. Mana inda, kan menunggu pengumuman Hari Raya. Thrill nyamu. 


Lamang = Makan ruji Hari Raya bagi urang malas kan masak

Tapi karang ani inda tia lagi thrill. Sudah tau bila kan raya. Jadi urang pun gagau sekali nganya, menyadiakan barang sudah beparut, baputong, digiling tinggal kan masak. Gagu tia malam raya semua kan bemasak. Kalau di Kuching ani, nada lain resepinya, selalunya, ayam masak merah, daging masak hitam, rendang daging dangan ketupat. Lamang, membali tah nganya. Malas tah urang kan mengerajakan. Tapi di rumah Mama, masak pulang kedia tu Kelupis. Best.. best!


Yang mana bisai pakai Raya ani?

Urang kan raya ani macam-macam kan di bali pakai hidangan. Elisa punya plan beraya lain sedikit. Kan membali barang hiasan dirinya. Ku bawa ke kadai, bahagian ani tah jadi kesukaan.


Warna Amas bisai ka, atau yang hitam ani?

Abis semua di pisi-pisinya. Apa indakah diunjar nya. Malas jua ku kan menagurkan. Ditagur pun, mengantol nganya tu.


Inda tah jadi membali ani. Mahal harganya!! Inda cukup usin ku!

Aku pun inda tau apakan di mau nya. Diambil nya, lapas atu di taruhnya bebalik. Antam saja tah... Elisa punya plan Raya.

Thursday, September 27, 2007

Kugiran Dalam Bilik!

http://aididitrecord.blogspot.com


Aku dangan Norm bekawan dari tahun 1994. Kenal-kenal saja, tarus kan main band (jamming session) masa di KL dulu. Aku main gitar pun inda merati. Jangan tah lagi kan main drum. Migang kayu drum pun inda pernah.

Bah baru-baru ani ada ku madahankan dangan kedia, biar tah ku menulong mambuatkan blog dangan kedia pakai compilation lagu-lagu nya. http://aididitrecord.blogspot.com tampat blog nya. Ada sample lagu jua pakai mendangar. Ani tah, semua material sudah ku kumpul. Cuma kan membuat gambar dangan cover CD nya. Mau membali kah?? Inda mahal. Dalam RM10 nganya. Tapi kana tunggu dulu sampai dah siap baru tah kan order.

Yang bestnya, semua lagunya record pakai komputer nganya di bilik tidurnya.

Thursday, September 20, 2007

Bila Sudah Basar...

Masa kediaku damit, kami peradian selalu bakurapak pasal bila sudah basar, kami kan jadi apa. Ada yang kan jadi polis, askar, cikgu. Macam-macam tah nyamu angan-agan kanak-kanak ani. Ujung-ujung, becakal jua jadi nya... Tapi yang pastinya, apa yang kediaku iski kan jadi, inda menjadi. Jadi lain pulang karang ani. Inda pernah tepikir pulang ku.

Karang ani, bila ku liati Elisa, selalu ku befikir, apa inda kah cita-cita anak ku sorang ani? Adalah urang baik hati mengantar emel dangan kediaku hari ani pasal benda ani.

WHAT WILL I BE WHEN I GROW UP?

OR...


OR...


OR...



Friday, September 14, 2007

Acara Menguyung Kuih

Pasar Ramadhan di Satok Kuching

Selagi dahulu, bulan puasa di Limbang, jarang jua kan membali kuih-kuihan pakai sungkai. Malar saja kana sadakahi urang subalah kiri-kanan. Setiap hari bebalas besadakah ani, panuh bakas "container" di rumah bejuritan. Kan membaliki bakas, bagi malu jua kalau kusong. Atu tia jadi bebalas-balas sadakah kuih hari-hari. Nah, inda payah membali nyamu!!


Inda ku belaku masuk. Luan tah sasaknya.

Tapi karang ani lain tia sudah jadinya. Kalau lagi di Kuching ani, riuh tia jelama kan mengelingai "Bazaar Ramadhan". Di Satok ada, di Petra Jaya ada, di Tabuan ada, di Pending ada, di Batu Tujuh ada... di mana-mana pun ada. Andang bejurit. Aku sebanarnya malas kan ikut-ikutan. Sasak nyamu! 

Kelemarin kediaku pegi ke Pasar Ramadhan di Satok. Sudah tia jeraya sasak, parking payah mengunjar, jelama pun betimbun. Salah-salah bejalan, kana bintih pulang kali! Kediaku bukan membali apa-apa pun. Biasalah, pebinian menyuruh kan membali kuih kan dibawa mulih pakai sungkai. Sampai-sampai sana, kepijaran kediaku. Mana inda, SASAK BANAR! Kan masuk ke dalam pun inda ku tetulus.


Macam-macam bangsa ada. Kan sungkai jua mengkali?

Apa sebanarnya urang kan unjar di sini ani? Kuih-kuihan macam sama saja ku liat dari ujung ke ujung. Kalau kan membali lauk panggang Terubuk ada jua lojiknya. Galurat ku meliat jelama luan sasak ani eh. Baru jua pukul 5 patang... jelama ramai di sini ani macam bebubutan kan membali kuih. Inda tah ku tesurong masuk luan dalam. Diluar tah saja. Ayung ku meliat!


Wah! Ramainya jelama.

Pelamaing ku, kalau luan ramai jelama dalam bazaar ani, salah-salah kana rimpih bejunyakkan. Yang kesian, kanak-kanak damit. Bukannya nampak lagi kalau luan sasak. Ku rasa karang ani urang malas kan membuat kuih-kuihan di rumah. Ya tatu memajal diri sendiri ke bazaar ani membali kuih kan sungkai. Inda macam lagi dahulu. Asal bulan puasa saja, macam-macam resepi kan di buat. Bukan untuk makan sendiri, tapi kan bebalas sadakah. Kan bisai....


Tampat urang menunu panggang-panggangan

Kalau kan pegi Bazaar Ramadhan cemiani, mau nuhun awal. Mana inda, jeraya sasak, parking payah. Biasanya tampat cemiani ani selalunya start panuh pukul 3-4 patang lagi. Macam pesta kan.... pesta membubut kuih sungkai! Tapi sungkai tatap pukul 6 lalu, sajuk tia kuihnya.


Kajam-kisap mata ku mengambil gambar ani tekana asap panggangan

Kediaku sampai karang ani inda jua luan minat banar kan membali kuih-kuihan di Bazaar Ramadhan ani. Cuma yang ku siok ani, membawa kanak-kanak membali di sana. Biasa laa "moral support" berpuasa. Kira upah kuih kan sungkai lah tu. Baik upah kuih dari upah "ang pau Raya"!!!

Wednesday, September 12, 2007

Abak-Abak Naik Bilun

Bilun Damit Twin-Otter Miri-Limbang-Lawas

Marista zaman urang lakat lagi makai seluar batis kubut-kubut awal tahun 80'an, kira be-usin banar tah dangan kalau dapat menaiki bilun. Kediaku inda berapa ingat bila kediaku mula-mula naik bilun. Kalau inda silap, lagi ku sakulah randah. Kalau di Limbang, bilun Twin-Otter MAS tah nganya kejumpahan. Inda basar, muat jua 19 jelama.

Selagi damit, asal masuk bilun, amai tah tangan kami peradian kan mengatik-ngatik naendah dalam bilun. Nasib baik Twin-Otter nganya. Kalau Boeng, lagi tah amai sampai kan becakal. Marah Mama... indakan pandai teranah! Baru-baruan tah tu nyamu!


Cemani tah rupanya dalam bilun ani. Macam naik bas nganya

Lagi damit sanang nganya ku masuk bilun ani. Karang ani, badan bagak, mengimbit masuk dalam bilun ani. Kalau duduk bekungsi kerusi, payah kan beringsut. Kan menguliat pun kepayahan. Sampai karang ani, kediaku lakat lagi abak-abak kalau naik Twin-Otter ani. Sudah tah damit, beringgut lagi masa terabang. Mama sampai karang ani beuri. Waris mengkali kediaku ani!

Paling ku beuri, masa bilun ani kan runduk. Kalau runduk di Miri inda pulang. Tapi kalau runduk di Lawas sama Airport lama Limbang, bah.. ijap tah ku banar. Mana inda, tampat kan runduk luan tah damit. Pindik lagi jeraya nya! Rasakan menabak arah rumbu. Jauh palis..!!


Airport lama Limbang

Esok kan puasa, tekanang kediaku sungkai sama mulah nini di Limbang. Bila ku ingat bebalik, batah sudah ku inda mulih ke Limbang ani. Atu tia kan menulis cerita pasal bilun ani. Lagi dahulu, Airport Limbang damit nganya. Karang ani basar sudah. Kalau lagi dahulu, kan naik bilun ani ramai tah sudara mengantar ke Airport. Naiknya 19 urang nganya. Yang di Airport mengantar, jelamanya macam sekampung. Semua kan meliat bilun ani terabang-runduk.


Landasan Airport lama tampat bilun runduk

Time table bilun damit ani inda jua lurus. Malar kan delay saja. Kalau ujan turun membarabak, inda tia terabang. Ada yang kana cancel. Ada jua jadi delay menunggu sepatang-patang di Airport menunggu ujan beranti.

Kadang-kadang, masa ku menaiki bilun ani di Limbang, ada jua ku teliat kerita di jeraya sebalah cuba kan menguyung bilun terabang. Kan meliat dari dakat mengkali. Keliatan tangan kanak-kanak melambai-lambai bilun. Macam tah urang ingau!


Airport Baru Limbang

Karang ani, jarang sudah keluarga ku menaiki bilun ke Limbang. Bekerita nganya. Jeraya pun sudah bisai. Kerita pun pun sudah bagus. Lagipun, dapat jua kan mengangkut banyak naendah dalam bonet. Kan bebata kuasi (kawasi) beguni-guni pun buleh. Asal tesurong membuai saja.


Entrance Airport Limbang

Last aku ke Limbang ujung tahun 2004. Atu pun menaiki bilun Fokker F50. Inda kerasan batahnya. Barukan memurancah sekajap dalam bilun, sudah tia sampai. Runduk pun di Airport baru Limbang. Airport lama sudah inda kana kelinga lagi. Berumbu sana-sini.

Karang ani, iski pulang ku kan naik lagi bilun damit ani. Ada pulang ku naik hari atu dari Mukah ke Kuching. Banyak sudah kerusinya tekulabak kainnya. Tua sudah kali. Beringgut? Atu tah yang thrill banar!!

Wednesday, September 5, 2007

Penggilan Kawin Di Kabong

Baru tah ku mensai penggilan kawin di kampung lain. Biasanya di Limbang, Kuching dangan Brunei nganya. Sekali-sekala siok jua pasal penggilan kawin ani, lain tampat, lain adatnya. Baru ujung minggu lapas adi ipar ku kawin penggilan arah kampung bininya di Kabong. Jauh jua eh....


Pengantin bejalan...dari Kampung Hilir. Urang membawa pemarang jadi kepala.

Lapas baca nikah pagi atu, aku berdirian diluar rumah pengantin becerita dangan sudaranya. Katanya, adat dorang ani, kalau kan besanding, pengantin mesti beliun kampung bejalan batis. Ngaleh ni eh!


Muka pengantin pun kengalehan tu nah!

Kalau di Limbang, lagi dahulu banar pulang pengantin laki bejalan arah rumah pengantin bini-bini. Membawa barian siap hadrah lagi tu. Yang di Kabong ani lain sedikit. Lapas baca nikah, besalin dahulu, tarus bejalan beliun kampung. Tangahari lagi tu... pijar ni eh kehangatan!


Kumpulan hadrah. Banyak bini-bini jadi ahli.

Ku ingat penggilan kawin di kampung nini di Merapok nganya betulis aturcara. Di Kabong ani ada jua yang betulis-tulis ani. Tapi menulis AJK keraja nganya laa.


Tukang Lap pun ada kana tuliskan.


Pemerhati Majlis? Apa sebanarnya keraja nya ni?

Dalam banyak-banyak AJK majlis kawin ani, Pemerhati Majlis nganya yang ku inda tau apakan kerajanya. Musykil jua kediaku. Kalau kan dikirakan, aku pun buleh jadi Pemerhati Majlis. Inda jua payah, meliat nganya...

Jangan ingat di Brunei dangan Limbang nganya kan muangkayahkan karaoke masa penggilan kawin ani. Di Kabong ani lagi hebat nyamu. Siap dibuatkan pentas pakai urang bekaraoke malam-malam hari. Dua malam bekaraoke. Sekampung turun meliat. Macam Fun-Fair! Siap ada urang bejual siring jeraya lagi!


Ani tah pentasnya kana buatkan pakai urang bekaraoke malam hari.


Bau & Mukah idol belagu karaoke! Peradian mentua ku ni andang karak karaoke!

Mula ku ingat macam di Limbang. Tapi di sini andang hebat banar urang mengelingai karaoke ani. Macam "EVENT OF THE YEAR". Sekampung turun meliat malam hari. Riuh bekeriakan jelama siring-siring. Elisa pun riuh banar kedia. Mengalai saja.....


video
Elisa mengalai......