Wednesday, September 5, 2007

Penggilan Kawin Di Kabong

Baru tah ku mensai penggilan kawin di kampung lain. Biasanya di Limbang, Kuching dangan Brunei nganya. Sekali-sekala siok jua pasal penggilan kawin ani, lain tampat, lain adatnya. Baru ujung minggu lapas adi ipar ku kawin penggilan arah kampung bininya di Kabong. Jauh jua eh....


Pengantin bejalan...dari Kampung Hilir. Urang membawa pemarang jadi kepala.

Lapas baca nikah pagi atu, aku berdirian diluar rumah pengantin becerita dangan sudaranya. Katanya, adat dorang ani, kalau kan besanding, pengantin mesti beliun kampung bejalan batis. Ngaleh ni eh!


Muka pengantin pun kengalehan tu nah!

Kalau di Limbang, lagi dahulu banar pulang pengantin laki bejalan arah rumah pengantin bini-bini. Membawa barian siap hadrah lagi tu. Yang di Kabong ani lain sedikit. Lapas baca nikah, besalin dahulu, tarus bejalan beliun kampung. Tangahari lagi tu... pijar ni eh kehangatan!


Kumpulan hadrah. Banyak bini-bini jadi ahli.

Ku ingat penggilan kawin di kampung nini di Merapok nganya betulis aturcara. Di Kabong ani ada jua yang betulis-tulis ani. Tapi menulis AJK keraja nganya laa.


Tukang Lap pun ada kana tuliskan.


Pemerhati Majlis? Apa sebanarnya keraja nya ni?

Dalam banyak-banyak AJK majlis kawin ani, Pemerhati Majlis nganya yang ku inda tau apakan kerajanya. Musykil jua kediaku. Kalau kan dikirakan, aku pun buleh jadi Pemerhati Majlis. Inda jua payah, meliat nganya...

Jangan ingat di Brunei dangan Limbang nganya kan muangkayahkan karaoke masa penggilan kawin ani. Di Kabong ani lagi hebat nyamu. Siap dibuatkan pentas pakai urang bekaraoke malam-malam hari. Dua malam bekaraoke. Sekampung turun meliat. Macam Fun-Fair! Siap ada urang bejual siring jeraya lagi!


Ani tah pentasnya kana buatkan pakai urang bekaraoke malam hari.


Bau & Mukah idol belagu karaoke! Peradian mentua ku ni andang karak karaoke!

Mula ku ingat macam di Limbang. Tapi di sini andang hebat banar urang mengelingai karaoke ani. Macam "EVENT OF THE YEAR". Sekampung turun meliat malam hari. Riuh bekeriakan jelama siring-siring. Elisa pun riuh banar kedia. Mengalai saja.....


Elisa mengalai......

4 comments:

Anonymous said...

hehe..pemerhati majlis = tukang tinguk

silabi said...

ingat ku masa mengayau uang kawin di batu 8, limbang. siap ada pertandingan 'ratu cantik' sama 'ratu kebaya'.. time bujang..biasalah. di mana ada uang begambus..pigi.

Anonymous said...

salam.. kesiukan ku eh membaca cerita2 kita d blog ani, first time ku singgah ni, baru kejumpahan. iski ku mbaca sbb kita bekurapak brunei d sni ah. nda dapat ku menahan dari ketawa sorang2 masa membaca part tukang lap sama permerhati majlis ahh. rajin2 tah kita becerita ah, nanti dpt jua ku 'menyubok' lagi blog kita ani.

HERMZZ said...

Betimbun blog dalam internet. Inda ada yang menulis dalam bahasa Brunei. Sayang jua bahasanya atu kalau inda dipakai.

Yang banarnya, bahasa Brunei ani cali kalau di tulis. Kalau di kurapakan inda pulang. Tapi kalau di baca, aku pun ketawa!