Mukah - Old Town

Bangun tidor awal. 7.30 pagi. Tekajut adi ku betelipon. Kacau eh! Bah.. alang-alang tebangun, baik tah bangun tarus. Batah menge"check" email masuk, parutku bebunyi sudah. LAPAR amat lah tu! Mandi, besiap, turun ke bawah mencari tampat breakfast. Tapi di mana ah?

King Inn tampat ku diam. RM50 semalam. Ada ASTRO & free wifi geng!

Turun ke bawah keluar main entrance, palak-palak mata ku meliat keluar befikir kemana ku kan breakfast. Parut sudah lapar terasa kan makan apa saja. Macam belubang parut ani bubus. Mati kelaparan! Ahhh... baru tah ku ingat. Tahun lapas aku kemari, kawanku membawa kediaku ke kadai makan Mas Cafe di sebarang King Inn ani. Baik tah ku ke sana. Antam saja tia kan makan apa. Makanan nyaman bukan pilihan sudah ni. Menampal parut bubus dulu.

Tunah di dapan arah bendera Sarawak kadai Mas Cafe

Masuk-masuk saja kadai ani, terasa macam dejavu saja. Memang laa, tahun lapas aku ke sini makan. Aku pun inda ingat apa yang ku makan dulu. Inda dahal tu, nasi lemak saja tah. Not bad.. but not so great. Buleh lah tahan makan dangan minum Milo Ice harga RM4.30.

Dalam Mas Cafe. Sunyi inda macam dulu panuh full house

Dulu aku ke kadai ani makan, ramai jelama. Tekana Hari Guru peringkat kebangsaan. Kiranya seluruh Malaysia kemari. Bandar damit, kadai damit, jeraya damit.. jelama beribu. Hari ani bisai. Sunyi... sanang kan memilih makanan. Aman dunia ku kan makan.

Di dapan waterfront Mukah

Lapas kekanyangan, baru rasa manusia sedikit. Alhamdulillah. Baru ada semangat kan bejalan meliat kadai-kadai. Bejalan tah ku ke waterfront kan ke kadai tamu di Mukah ani. Inda banyak perubahan dari last time aku datang sini. Ramai jua jelama. Di dapan waterfront, banyak jua tungkang dangan kapal lauk. Biasala Mukah ani. Lauk-lauknya murah-murah lagi fresh.

Ramai bedagang lauk di tamu siring waterfront.

Aku bukan membali apa-apa pun. Usin pun inda banyak ni. Inda jua ada beza kalau ku bawa banyak usin. Inda jua ku membali apa-apa. Saja kan meliat tamunya ani saja. Mana tau ada urang ku kenal ka... sambil-sambil mengambil gambar. Fresh-fresh lauknya geng! Murah? Buleh laa.. 

The famous Umai on the making

Di Mukah ani, barang paling glamer UMAI. Banyak urang bedagang umai. Dapat jua ku meliat sekali lagi dorang membuat umai. Ani baru fresh umai nyamu. Tapi aku inda jua minat banar umai ani. Tampat lain di Sarawak ani ada pulang bejual. Tapi inda se"original" di Mukah ani. Kalau ku balik ke Kuching pakai darat, memang ku angkut ni. Aku kan naik bilon bisok. Lupakan saja...

Di sini ani tah banyak bejual lauk nama Jamah murah-murah & fresh

Kawanku madahkan, ada sejenis lauk nama Jamah di Mukah ani. Tampat lain ada jua bejual, tapi inda sama macam di Mukah. Inda sama indong mengkali.  Aku pernah makan lauk ani di sini tahun lapas. Memang lain rasanya. Yang disini NYAMAN! Kira macam lauk Kuasi di Limbang. Di Kuching ada jua Kuasi tapi basar-basar. Limbang punya Kuasi rasa original. Damit tapi manis. Samalah tu konsepnya dangan lauk Jamah ani di Mukah. Jangan-jangan lauk Jamah dangan Kuasi ani bepupu mengkali..???

Tamu di Mukah ani banyak buah jua. Murah!!

Kalau barang siapa kan ke Mukah ani kan membali buah-buah, baik tah membali buah nanas. Bali Nanas Sawit. Yang ani nyaman nanasnya. Bukan nanas sebarangan... Buleh jua ku madahkan, nanas ani ku consider King of Nanas. Manis geng! Kalau buat jus nanas sajok-sajok, mesti kepisan urang minum kenyamanan!

Tamu bejual sayur & buah

Bila ku bejalan-jalan di tamunya ani, teringat ku kan tamu di Limbang. Las aku bejalan di sana tahun 2000, membawa mulah nini membali barang kan di masak di rumah. Tekajut urang di tamu meliat nini bejalan dangan kediaku. Ingatkan anaknya... tapi cucunya. "Basar banar cucu kita ani?" nya dorang. Aku terasa macam alien saja di tamu di Limbang atu. Ramai sudah urang inda kenal aku. Cemiatu tah perasaanku karang ani di tamu Mukah ani. Inda ada urang kenal aku. Aku pun inda kenal urang. Macam UFO aku ani di tamu Mukah ani.

Tamu karing Mukah. Di sini banyak bejual kuih-kuihan urang Melanau

Di Mukah ani pun famous jua dangan kuih-kuih Melanau. Tebaloi... kuih Sagu, Sagu... errr... apa lagi ah? Luan banyak bah. Inda tah ku tahu lagi nyamu. Kan meng"interview" urang di tamu tadi pasal nama-nama kuih-kuihannya ani, galat jua ku. Semua urang becakap Melanau. Aku inda merati. Karang ku bekurapak Limbang takut kana ucapi "illegal immigrant" kediaku ani.

Jeti dapan tamu Mukah tampat mengangkut lauk

Di Mukah ani kurasa, paling best kalau mengangkut lauk. Bandar ani memang di kuala sungai. Lauk memang makanan ruji urang sini selain daripada sagu. Lemantak (ambuyat) sagu pun famous sini ani. Nyaman kah lemantak ani? Aku inda pernah mensai. Apakan rasanya? Setiap kali ku tanyakan urang makan lemantak ani, semua madahkan nyaman. Bila ku tanya camana rasanya, balik-balik jua urang madahkan NYAMAN. Apakan rasanya? rasa oren kaa? Rasa nasi kaa? Rasa coklet kaa? Semua inda dapat madahkan apa rasanya. Cemana tu ah?

Apa-apa pun, balum lagi ku dapat kan mengayau jauh-jauh dalam Mukah ani. Ani pun ku bejalan batis nganya ni. Kerita, adi ku pakai pegi ke Politeknik kan register. Karang tah mengkali.