Biskal Baru Pak Salleh

Di Kampung Sekulah rumah kami di siring tambing,

Sanang tah kami bagalau, menyasah kain,

Marambat nanggalah, mengail lawang, mangambil aing,

Tapi ya titu,

Mun aing dalam, tanah pun lacah, uras basipah,

Membari garing kan turun ka bawah.

Di sabalah darat, Pak Salleh berumah,

Di subarang jaraya ada sakolah,

Sakalamin dengan Si Usin,

Si Jais anaknya, bininya Dayangku Jijah,

Anaknya damit namanya - antah.

Pak Salleh sudah lama manginci,

Kan membali biskal di kadai Kheng Lee,

Biskal laki-laki buatan Raleigh,

Bisai, tinggi balampung di dapan,

Batan di belakang untuk mambawa lauk gulaian.

Ganya balum cukup usin disimpan,

Tapaksa tah bekulimat bebulan-bulan,

Tapi barkat sabar orang tua,

Samakin banyak baloreh tah jua,

Sagalanya ditapok, dirahsia,

Kan menunjukkan bisidia, yang inda pacaya,

Kandila dapat jua katani bagaya.

Sampai harinya lapas subuh,

Anak Pak Salleh masih bakuruh,

Pak Salleh inda lagi sabar, gagaskan kaluar,

Saluar panjang, baju palanin batarikah cikar,

Rambut bakurul balumir minyak, bakilat-kilat,

Inda dapat di inggap lalat,

Dang Jijah hiran tarus batanya,

"Kita sanggaut kan ke mana?",

"Liat saja tah karang, udahku balik tunggu saja".

Pukol lapan Pak Salleh bakasut, duduk di bandul,

Sigupan di mulut takapol-kapol,

Jalan bagaya, limbai tangan, iski rupanya,

Asap sigupan samakin kuat di jaraya.

Anggaran dua jam, hajat pun sampai,

Siok rasanya kan malumpat mengalai,

Lidut-lidut Pak Salleh mengayuh biskal baru,

Disangaja supaya urang tau,

Di jambatan papan, Aji Mat Japar managurkan,

Tangah Buntak, Liau Napsi samua badirian,

Palak-palak di pantaran,

Mebiut bibir pun ada jua,

Sambil babisik "Sagai Nya".

Paranak Pak Salleh inda lagi tahan,

Kan meliat apa bawahan,

Mainan di tangan bapalantingan,

Madam belusir menguyung bapanya,

Masih lagi mengayuh bagaya.

Dipintal Si Usin "handle" di dapan,

Si Jais menyurung mamigang tan,

Makin tah laju biskal bajalan,

Pak Salleh ijab pijar-pijaran,

Biskal inda dapat ditahan.

Batu basar di sana-sini,

Tehantak biskal melambung tinggi,

Liok-liok tagili-gili,

Macam orang mauk kan badiri.

Takulipit di lupak biskal menyiring,

Parit basar saparuh karing,

Tarus manabak samua baguring,

Ampar kajang mangurising.

Kerasahan gagarnya di pohon pinang,

Anak sulangkir bakariakan disarang,

Batarabangan indungnya takut ditabang.

Menahan sakit di parit bakucah,

Baju palanin balumir kamah,

Saluar panjang bagunjai-gunjai abis badarah,

Sigupan gugur lalu patah.

Luka, salahau, bincut inda lagi sadar,

Urang bakarumun Pak Salleh awar,

Batiga membincang biskal kaluar,

Lampungnya pacah, brek pilai, roda tabaliut,

Tapaksa diusung barinut-rinut,

Sampai di rumah Dang Jijah takajut.

"Pikirku kita ke kadai",

"Rupanya di paya kita baluwai",

Pak Salleh diam, mengambil cukin bagantung di dawai,

Panas hati menuju ka sungai,

Si Usin, Si Jais balum mulih,

Takut nanti kana sambalih,

Sudah patang baru berani,

Ingsut-ingsut naik sarambi,

Semalaman inda betidur ta palak-palak,

Pak Salleh menganang biskalnya ancur habis larak.

Nukilan Allahyarham Datu Mustapha Besar