Lumba Karbau

Bagi kadiaku karbau ani bida buatannya,

Parut urang batian, batisnya buntak saja,

Balusir lidut matalih inda tah ada,

Lain tah kuda,

Bisai, laju dan marati tuan ampunya,

Tapi bila bajanuari,

Atau hari ibu bapa sakulah kami,

Banyak urang iski,

Inda talintas di kapalaku mangapa katani,

Balumba karbau bakali-kali.

Barapa hari sabalum balumba,

Kacuh urang basadia,

Mangunjar karbau baluai di paya,

Bakarih-karih maungkayahkannya,

Dari Madamit, Batu Danau, Ipai pun ada,

Tinggalkan kampung, tinggal karaja,

Indaku tau apakah pasalnya,

Lumba karbau jua dikalinga.

Waktu bamula karbau bajuntun,

Yang ampunya di dapan manuntun,

Menaiki karbau dari balakang,

Pegawai mambawa sabuting sanapang,

BOOOOM... bunyi guruh lapas timbakan,

Abak-abak atiku kan kapisan,

Takajut karbau katakutan,

Balusiran batampiaran,

Urang marista inda didangarkan,

Sanapang patah jangan digunakan.

Dua puluh ikung ikut bamula,

Lima ikung ka balakang tujunya,

Lima balas tinggal balawan,

Balum tantu mangabiskan,

Baliun padang sampai garisan,

Ujan pun turun mambarabak,

Padang basah mulai licak,

Manggurut karbau pijar-pijaran,

Manuju urang ramai badirian,

Kapala tunduk kan mangansung,

Tunggang-langgang manuju kampung,

Sab nyangku jangan diagut,

Lumba karbau mambari takut.

Karbau inda lagi mandangar,

Apa di dapan atu dilanggar,

Pagar rimpih tiang tacabut,

Urang luar kalang-kabut,

Kanak-kanak manungkal takut,

Panunggang palau paning lalat,

Inda tau apakan dibuat,

Ada tarajun tarus mengabab,

Marunggau lari macam diparap,

Yang memintal tiang bandera,

Ngingis badan inda dikira,

Karana ampir rumah sabalah,

Rumah Ka Kilong galagarnya randah,

Palis-palis mun manyabarang,

Karbau manyuruk nahas panunggang,

Sudah tau binatang babal,

Lumba karbau jangan dipajal.

Barapa ikung masih balumba,

Saikung jauh manang nampaknya,

Antah mangapa samana-mana,

Inda barusik marang panunggangnya,

Diacut, ditarik ikung inda beringsut,

Karbau balakang barinut-rinut,

Sampai ka ujung hadiah disambut,

Kan ada parambahan,

Inginkan laju barinut bajalan.

Dari jauh malakak katawa,

Urang maliat karbau baria,

Betumpuk-tumpuk abis basipah,

Kana ujan abis maluyah,

Saikung baranti sabalah,

Aing kaluar dakan disimbah,

Bukan ujan mambari basah,

Karbau bakamih balum tah sudah,

Sakali lagi ku bapadah,

Lumba karbau bukannya mudah.

Nukilan Allahyarham Datu Mustapha Besar