Aku gerenti cerita ani sudah malar kana sabut bibiran. Tanya saja siapa-siapa, mesti madahkan.. "Mahal eh!". Kalau kan cerita atau kan bebincang kenapa ya naik harga, sampai tahun dapan pun inda abis. Adang tia mengkali bacarita pasal harga ani.
Kali ani kediaku bukan kan cerita pasal harga minyak. Tapi cerita kediaku mambali minyak selapas harga naik 5 hari. Masa atu malam. Kerita ku minyak tinggal sadikit. Biniku ahir muleh keraja kira kununnya kediaku mambawa Elisa (anakku) kan mengabil Mama nya. Tarus tia ku ka Petronas kan mambali minyak. Sunyi banar nyamu di stesen... kemahalan banar mangkali urang kan mambali minyak karang ani pelamaingku.
Kediaku malam atu kalupahan mambawa usin labih. Dalam poket ku cuma ada RM25. Bah, alang-alang di stesen, mambali saja tia ku. Elisa manunggu kediaku dalam kerita. Kalau dulu, RM25 usin dapat mambali paling-paling pun dakan 15 liter minyak. Kali ani inda sampai pun 10 liter. Andang mahal. Jadi sekajap nganya kediaku mengepam minyak.
Masuk ku kerita, Elisa betanya. "Kejap ajak Papa isik minyak oh!"
Ku jawab, "Aok! Sikit ajak minyak Papa beli".
Tiba-tiba, masa kan bejalan keluar dari stesen minyak, Elisa becakap lagi.
"Papa sikda duit beli minyak ooh!" jawab Elisa. Ketawa ku gali hati mendangar cakapnya. Ada jua banarnya cakapnya atu. Kalau harga naik lagi, lagi sekalip mata memanjut Papa isi tangki (nyangku dalam hati).
No comments:
Post a Comment