Selamat Hari Raya

Banyak macam jenis cerita setiap kali hari raya. Ada sedih, ada siok, ada yang boring dan ada jua best. Tahun 2003 antara hari raya yang sedih jua untuk aku. Nini meninggal sebalum raya. Kediaku inda kan sampat muleh ka Limbang kan bajumpa Nini buat kali terakhir. Aku pun inda sampat kan pigi tahlil Nini sebab masa atu mulah Angah pun koma di KL.

Aku kesian banar sama bapa. Serba salah kedia kan mengaga mulah Angah di China dulu kan manulong membawa muleh ke Malaysia. Masa atu, mulah Angah sudah koma. Nini pun baru maninggal di Limbang. Tapi ku rasa bapa lagi kesian dengan mulah Angah sebab Nini sudah maninggal, mulah Angah masih lagi ada peluang untuk kedia bajumpa.

Masa atu Mama sama adi beradi ku lain di Limbang pegi tahlil Nini. Aku dangan adi ku sorang lagi di Kuching pasal kononnya kan manunggu bapa kononnya kan sama muleh ke Limbang lapas mambawa mulah Angah muleh. Tapi bapa talipon aku sehari sebalum raya, kedidia sama mulah Angah terpaksa tinggal di KL. Aku sama adiku saja beraya di Kuching... makan hari raya pun di Mc Donald sebab kami inda masak apa-apa pun di rumah.

Bapa muleh ke Kuching hari raya kedua madahkan mulah Angah sudah sadar dari koma. Sanang hati ku jua mendangarkan. Tapi nya bapa, kesian ya dengan Angah bini sorang-sorang di KL mendangani mulah Angah di hospital. Kediaku masa atu malas jua kan bafikir lagi, selajur tah ku ke KL kan bajumpa dangan mulah Angah. Alhamdulillah, aku dengan Pak Mit sama-sama naik bilun. Sanang hati mulah Angah maliat kami dua datang. Walaupun inda senyum, tapi dari matanya dapat ku baca, kedia menangis sebab suka hati kami datang jua.

Masa atu mulah Angah alum tau Nini maninggal takut kedia tekajut. Mana jua ulah, urang baru ja sadar koma, takut apa-apa hal lagi. Entah berapa lama mulah Angah inda tau mulah Nini maninggal sudah, tapi yang ku dangar kedia sedih banar mendangarkan sebab kedia sudah betahun jua inda sampat bajumpa dengan mulah Nini sebab guring limpang sakit.

Masa ku di KL atu, sampat jua ku mangunjarkan lauk Terubok. Sampat jua ku masakan untuk mulah Angah kuatan katanya tais liur kan makan. Andang payah masa atu sebab time atu hari raya keempat di KL. Mana ada kadai buka. Oleh sebab aku biasa sudah diam di KL, inda menjadi masalah tah jua aku kan mengungkayahkan liur mulah Angah atu. Siok ku maliat kedidia makan beselera!

Jadi, dalam masa 2 bulan atu, ramai tah sanak-saudara datang dari Brunei sama Limbang kan mengaga mulah Angah di KL. Tapi tanpa kami sadari jua, salah sorang pakcik ku, mulah Angah Haji, yang melawat atu pun maninggal jua inda batah bajumpa mulah Angah. Kami semua takajut banar! Aku jangan tah lagi... sudah betahun-tahun aku inda sampat bajumpa dengan mulah Angah Haji. Inda jua lagi kesampaian kan bajumpa lagi. Hari Raya tahun 2003 andang banar-banar kami sekeluarga rasai.

Hari raya tahun 2006 pun pengalaman yang hampir sama. Seminggu sebalum hari raya, mulah Angah maninggal. Aku konon-kononnya sudah besiap-siap kan muleh ke Limbang sama Lawas beraya. Tapi aku serba-salah jua sebab masa atu mulah Angah sakit tenat. Nya bapa, sukati ku saja kalau aku kan muleh ke Limbang. Tapi kedia tatap kan mendangani mulah Angah. Aku rasa, bapa mimang rapat banar dengan mulah Angah.

Aku pun inda sampai hari kan muleh ke Limbang jua, tapi aku bedoa setiap hari supaya Angah sihat semula sampat beraya sama kami sekeluarga. Lagi pun aku sudah batah inda melawat Nini-nini ku di Lawas kan behari raya angan ku. Sekali lagi, pengalaman hari raya tahun 2003 kami rasai. Mulah Angah meninggal seminggu sebalum Hari Raya. Terasa macam dejavu saja.

Tahun ani mimang sudah ku menyimpan hasrat atu kan beraya ke Limbangs sama Lawas. Tapi biniku sarat betian tahun ani. Bilun inda dapat menerima jua tu. Jangan tah lagi kan pakai darat!! Teberanak tia karang tangah jalan!!! Sekali lagi tahun ani aku inda belaku kan muleh raya. Tahun lapas kami sekeluarga pun beraya di Kuching saja. Jadi uleh kerana banyak dang sanak datang ke Kuching, malas tah ku kan muleh dulu, kononnya kan pigi tahun ani.

Semenjak tahun 2003, sampai 2008, aku alum parnah lagi muleh beraya. Bukan inda mau, ada saja aral melintang. Insyaallah, kalau inda ada apa-apa tahun dapan, kan ku surongi jua muleh beraya ani... insyaallah.

Apa-apa pun, tahun ani aku beraya di Kuching saja. Semua dang-sanak ku yang lain, peradian, bapa-mama muleh ke Limbang sudah hari ani. Tinggal tah ku sorang di sini beraya. Apa-apa pun, kepada siapa membaca blog ku ani aku ingin ucapkan Selamat Hari Raya, Maaf Zahir Batin.

ps:- Bapa, minta maaf banyak-banyak Pa, aku inda sampai kan besalam sama kita.

Kenangan Sungkai

Waktu urang bang azan Maghrib.

Aku : Minum jak kau dolok, Man.

Adiman : Sik apa... kau jak dolok.

Aku pun heran... sama-sama lapar bepuasa, sama-sama karing lihir. Inda patut ni.

Aku : Minum jak kau dolok.

Kediaku mengunjukki galas mug warna hitam berisi aing Nestum panas arah Adiman.

Adiman : Ehhh... Panas eh.. (komplen tia pulang)

Sluuuurp... slurrrrrp... Aaaah! Lapas mengirup aing atu sadikit, dibarakan nya arah ku bebalik. Ku irup aing Nestum atu.... Huyooo!!!! Best nya!!! Nyaman nya. Ku latakkan atas lantai sambil ku liat muka Adiman melangui meliat kediaku kehairanan. Tiba-tiba.....

Adiman : Hahahahahah. Gila kali nak kerja kita duak tok!!!! 

Aku : Huh (Tekajut ku.. gila pakah anak ani pelamaingku)

Adiman : Adakah sungkey minum aik Nestum segelas ajak?? Dah la kongsi kita duak!!! Hahahaha

Aku : Hahahaha 

Aku inda ada choice, tepaksa ikut ketawa pasal banar pulang katanya atu. Tapi apakan daya, kami inda ada usin.. jadi cukup lah tu. Dapat jua sungkai.....

Aku pun inda ingat sudah tahun bila kejadian ani. Yang pasti, bulan puasa zaman aku belajar di Matrikulasi di Kuala Lumpur dulu.

PS :- Kepada Adiman, bila lagik kita duak maok sungkey sama???

Baru Tah Ku Tau...

Kadang-kadang teringin jua ku bebalik zaman belajar dulu. Zaman-zaman atu ramai member, ada dari Sabah, dari Sarawak, Semenanjung atau mana-mana negera dalam dunia ani. Tapi kebanyakan selapas grad, inda pernah lagi ku jumpa bisidorang atau mahupun ada contact number.

Tapi ntah macamana start pagi tadi lapas sorang ku jumpa blog nya, dapat lagi dorang yang lain. Jadi, inda lah luan jua inda ada contact. Asal bajumpa dalam blog pun sudah kira bagus lah tu. Bagus jua ber"blog" ani.

Dalam banyak-banyak kawan-kawan ku yang berblog, aku sorang nganya yang pakai bahasa ani. Yang lain, English sama BM kebanyakan. Hantam saja laaa....

Kan Mencari Usin Labih Pakai Raya?

Banyak macam cara urang sekarang ani kan mengunjar usin labih pakai Raya. Ada yang bejual kuih, ada yang membuka gerai di Bazaar Ramadhan, ada yang mengambil upah menjait baju.. dan macam-macam tah lagi urang kerajakan.

Bagi yang inda ada skil-skil atu, ani tah kan ku padahkan ada cara mudah untuk mendapatkan usin labih pakai guna Raya. Jangan susah hati. Rezeki atu ada di mana-mana. Jadi yang ani bukan susah pun. Sanang saja. Asal ada internet sama komputer, buleh jalan sudah tu.

Bukan MLM atau online investment yang diharamkan kerajaan. Tapi benda ya baik dan sanang untuk diuruskan.

Kan tau lebih lanjut biskita??? Bah... takan saja di SINI

Mari Belajar Bahasa Jepun

Jangan tah bekurapak panjang. Maritah belajar bahasa Jepun.

















Apa macam? Pandai sudah?

Balik Kampung

Setiap kali Hari Raya, gagau tia semua urang mengungkayahkan muleh ke kampung. Ada yang sudah awal-awal lagi menabung usin labih membali kerita baru, servis kerita, pigi membali tiket bas atau bilun, atau mengasingkan usin sedikit pakai membali minyak kerita, bekongsi sama kawan-kawan.

Kediaku baru saja lapas meliat rancangan 360 TV3 sekajap tadi. Antara isu ceritanya pasal harga tiket bas naik sama membali tiket bas muleh kampung dijual oleh dorang Ulat Tiket. Setiap tahun tah cerita sama saja. Inda pandai kelanguan kah bisidorang di semenanjung ani dengan masalah ani? Alum jua pandai selasai masalahnya ani biar pun isu ani timbul setiap tahun.

HARGA TIKET MAHAL

Ramai yang kana interview kebanyakan komplen harga tiket bas naik 30%. Aku ingat tah harga tiket bas nya ani mahal macam tiket bilun. Rupanya tiket harga cuma bawah RM100 nganya. Dari harga RM33 naik ke RM43 pun sudah jelama kebisingan geraun-geraun!!! Alasannya, kami urang susah, berpendapatan rendah, student dan macam-macam lagi. Cheh...!

Alum lagi bisidorang kan mambuka mata masalah dorang Sabah Sarawak lagi tu (pelemaingku). Masa kediaku belajar dulu, bagi urang Sabah Sarawak, pasal muleh kampung ani mimang jadi masalah kewangan yang terbasar sekali. Terasa macam masalah negara tu. Mana inda, urang lain membali tiket bas inda sampai RM50. Kami membali tiket paling murah tah RM273 (Ani ke Kuching sehala nganya). Alum lagi macam aku muleh ke Miri (RM422 sehala). Dorang sabah lagi teruk. RM450 ke atas sehala. Kiranya kami kalau kan muleh kampung beraya atu, terpaksa jua berbelanja kan sampai RM1,000.

Dorang yang mana orang semenanjung, tiket RM50 pun dorang bising. Harga tiket bilun kami ani bukan buleh di kompromi. Mana ada diskaun. Ada yang sanggup inda makan nasi sebulan kan menyimpan usin kan muleh kampung. Dengan harga tiket miani, urang bausin pebaik, sanak jua parut kan membayar eh!! Jangan tah lagi jelama macam aku yang selalu inda bausin labih.

Jadi, kalau cerita pasal harga tiket bas muleh kampung beraya naik 30% atu, inda lah jadi masalah basar. Tu pun masih lagi bawah RM100. Cuba tiket bilun?? Alum tah kajumpahan harga atu muleh raya... mSampai betanduk tah manunggu.

TIKET AWAL HABIS

Ani antara komplen bisidorang dalam rancangan 360 atu. Kalau membali tiket bas, 2 minggu terakhir atu kompom abis tia sudah. Ada yang bekurapak madahkan inda tau lah cemana kan muleh lagi. Terpaksa telefon keluarga di kampung kan bebincang cemana kan mengungkayahkan muleh karang.

Apalah...! Ani masalah damit. Banyak lagi cara lain. Kalau sudah sanak payah kan befikir, mengayuh saja basikal. Kawan ku si Jek pernah bah mengayuh basikal dari KL sampai jua ke Pangkor bah (kalau inda silap la). Banyak cara kalau dibanar-banari kan muleh ani. Lakat lagi sama tanah. Bukan macam kami Sabah Sarawak. Kan naik kerita pun tinggalam dalam laut China Selatan tu karang!

Masalah tiket abis awal 2 minggu sebalum raya... Adeh.... ani perkara kecil saja. Kami Sabah Sarawak jangan kata 2 minggu sebalum raya... 2 bulan sebalum raya alum tantu dapat. Ada yang terpaksa membali tiket 6 bulan lagi awal.

MASALAH ULAT TIKET BAS

Ani antara cerita dalam rancangan 360 malam ani. Katanya masalah ani sudah lama. Senantiasa tah inda dapat diselesaikan. Macamana tah kan dapat diselesaikan? Dibanarkan membali tiket atu banyak-banyak. Mana inda dorang ulat tiket mengambil kesempatan.

Penyelesaian??? Sanang saja! Buat macam tiket bilun. Siapa bali, letak namanya tarus atas tiket atu. Masa membali, minta nombor IC sekali. Kalau kan tukar jelama pakai tiket, buat tukar di kaunter saja dan isu tiket baru atas nama urang baru atu. Dengan cara ani, ulat tiket kompom inda dapat kan bebisnes lagi.

KESIMPULANKU

Masalah muleh kampung ani inda jua masalah basar sebenarnya. Patut besyukur tah sebab kalau setakat tiket bas atu bawah takat RM100 atu kira bagus dah tu. Kalau inda mampu pun, jangan tah muleh. Kalau takut inda sampat membali tiket, bali tah tiket awal-awal. Bukannya mahal pun. Kalau kami dari Sabah Sarawak ani buleh mengungkayahkan balik kampung beraya dengan harga tiket mahal  sama tiket awal abis, kenapa bisidorang inda dapat??? Atu pun inda tasurong kah?

Sungkai Di Restoran

Kediaku inda jua berapa minat kan sungkai di kadai ani. Misti tah ku tebayang kan panuh sasak kadai makan sama batah sampai makanannya. Tapi lain pulang ceritanya sabtu sama hari minggu kelemarin. Macam sanang saja sungkai di kadai karang ani.

HARI SABTU

Asalnya kan membawa Elisa sama Mamanya ke kadai mengayau jalan-jalan. Daripada guring limpang di rumah baik tah bejalan meliat apakah kan dibali pakai raya tahun ani. Alang-alang bejalan, kan ku bawa bisidorang sungkai di luar saja. Ku bawa ke Singapore Chicken Rice di Batu 3. Batah ku mangunjar parking karita. Sampai badok sungkai, baru tah balurih.

Masuk saja kadai makan, tarus dapat seat. Kami order makanan, inda sampai 5 minit, sampai tia semua!!! Atu baru ya...n Tekajut ku eh! Bagus pulang daripada manunggu dalam kadai dari pukul 6pm, nuhun kan makan makanan atas mija layah-layah!

HARI MINGGU

Ku bawa Elisa sama Mamanya ke The Spring. Macam biasa mengayau, lapas atu, tinggal 10 minit lagi kan sungkai, ku bawa ke kadai Kenny Rogers. Tekajut ku lagi!! Mana inda, inda bejelama. Sanang ni eh!

Sambil manunggu baduk sungkai, kediaku mendangar radio pakai ear-phone handphone ku. Anggur ku mendangar radio :-

Elisa : Ma... mintak susu?

Mamanya : Nah... (sambil mangunjuki butul nenennya)

Cun masa Elisa mambuka tudung butul nenennya, masuk sudah waktu sungkai.

Elisa : Kenak Pa? Udah ka?

Aku : Huh?? (Macam urang tetua saja kedia ani. Macam tah puasa!!) Aok.. udah!

Baru tah kedia manuntum butul nenennya. Macam tau-tau saja waktu sungkai. Inda puasa pun buat-buat macam puasa.... cali jua ah...!

Zakat Fitrah

Aku tau, misti si Eddy alum bayar lagi ni zakat ni. Aku rasa, ramai jua yang alum lagi membayar zakat ani. Karang ani ramai yang betebiat kan membayar Zakat Fitrah ani. Kan raya baru tah kan gagau balusir ke Amil zakat kan membayar.

Bayangkan, ketani ani urang fakir miskin sama anak yatim-piatu yang cuma dapat kan mangintu usin zakat fitrah ani. Urang sibuk kan beraya sudah, ketani alum dapat usin kan mambali baju sama makanan untuk beraya disebabkan urang betebiat membayar zakat ani. Kesian kan.....

Aku bukankan asi-asi madahkan kediaku sudah membayar awal. Cuma aku besyukur sabab minggu pertama puasa pun aku sudah sadar kan membayar zakat ani masa melintasi pejabat baitulmal. Inda macam tahun-tahun lapas. Minggu terakhir baru tah kan gagau. Bila ku imagine kediaku urang susah kan mengungkayahkan musim raya inda bausin, cuba kan mengampiti usin zakat fitrah, kesian jua ku.

Bah geng, apa lagi... jangan tah luan betebiat lagi. Bayar tah selagi ada masa awal lakat. Jangan tah ingau kan membali badil sama kain baju raya kilat-kilat gap!

Sungkai

Setiap tahun asal masuk bulan puasa, inda ada cerita lain yang popular. Cerita pasal makanan pakai sungkai nganya yang urang ingaukan. Yang aku hairan, kediaku inda jua berapa kan gagau pasal makanan ani (inda ingau pun lampoh jua badanku). Kalau sungkai di rumah, atu inda jadi masalah. Bali saja makanan di luar atau masak, sungkai ikut stail sendiri di rumah.

Tapi zaman ani, urang suka sungkai di luar. Bagus pulang kalau sungkai di luar ani. Inda payah gagau kan masak. Inda ngaleh. Tapi ada jua kelemahannya. Bah, ani antara cerita ku masa zaman ku di KL dulu.

CARI TAMPAT DUDUK AWAL

Urang di KL andang pelik. Banar pulang jelamanya ramai di sana. Tapi asal kan sungkai, baru tah nampak jelamanya ramai banar. Restoran macam KFC dangan Mc Donald atau restoran mamak, mesti panuh. Kalau sungkai pukul 7.20pm, jelama sudah panuh duduk dalam kadai makan atau restoran atu seawal 6pm.

Yang peliknya, duduk saja, inda ada makanan pun atas mija. Kalau ada urang bukan islam kan makan pun inda lagi kan belaku. Yang kesiannya, dorang yang makan atu inda dapat kan duduk makan sebab dorangkan sungkai sana duduk sampai buka puasa.

Aku selalu tekana. Kalau ku bejalan di KL, asal kan sungkai saja, mesti sudah panuh urang duduk. Kalau kan makan duduk, terpaksa tah ku menunggu sampai pukul 8pm. Anggur menunggu, kediaku membali aing tin di kadai. Duduk siring tangga atau di kerusi Shoping Complex, sampai jelama abis sungkai.

ORDER MAKANAN SEBALUM SUNGKAI

Ani yang paling ku hairan. Ramai jua jelama di KL ani sudah tah duduk dari pukul 6pm manunggu kan sungkai, siap makan yang dah di order pun atas mija. Makanan panuh atas mija, tapi punduk-punduk nganya. Kalau pelancong meliat mesti kehairanan pasal makanan panuh atas mija, tapi inda dimakan. Misti pemandangan yang aneh bagi pelancong mengkali.

APA PATUT DIBUAT

Dalam bulan puasa ani inda sepatutnya becerita pasal makanan saja. Sepatutnya ketani misti jua jaga perangai. Kalau meliat cerita pasal sungkai ani, sepatutnya booking mija seawal pukul 6pm atu agak melampau. Mana inda, pasal ketani kan sungkai, urang lain yang kelaparan inda dapat makan. Ketani sepatutnya tunjuk perangai yang baik. Bukan menyusahkan urang lain. Lagi pun, bukan ketani yang makan dulu. Ketani misti tunggu masa sungkai.

Ketani selalu bafikir, oleh kerana ketani urang bepuasa, patut ketani kana bari kelebihan sebab ketani sudah belapar seharian. SALAH!! Sepatutnya ketani yang patut bersabar. Kalau ketani inda sabar, apa artinya puasa??? Nama saja puasa, tapi perangai inda macam berpuasa.

Fikirkan saja tah biskita....