Tuesday, July 31, 2007

Teringat Lagu Brunei...

Batah sudah ku inda mendangar lagu-lagu Brunei ani. Baru tah patang ani ku mengatek "external HDD" aku ani kan meliat apa di dalamnya. Kejumpahan tah kediaku lagu-lagu Brunei (antah siapa punya lagu). Ku dangar bis sidorang madahakan lagu dorang radio Brunei. batah inda mendangar, siok jua eh!








Bah... aku kan mengongsi saja tia ni geng!

Thursday, July 26, 2007

Berusah Kawin (Kampung Style)

Kalau di Kuching ani, asal cerita pasal urang kawin, memang urang betanya "Dewan ney pakey sidak urang kawen ya?" (Dewan mana kan dipakai urang kawin?). Di Kuching ani mana ada cerita lain nyamu. Asal urang kawin saja, mestilah guna dewan. Dewan Civic Centre, Dewan Hikmah, Dewan Pustaka, Dewan Serbaguna... macam-macam lagi dewan lah. Dewan Undangan Negeri Sarawak nganya urang alum parnah ku dangar urang makai !! Ada jua lakat lagi urang di Kuching ani makai rumah guna berusah kawin-kawinan ani. Tapi inda banyak. Bukannya ambong inda kan mau berusah di rumah atau trend, tapi rumah urang di Kuching ani sampit-sampit. Be-indikkan siku kalau luan ramai jelama dalam rumah.

Batah sudah kediaku inda mendangar urang berusah kawin di kampung bah. Last sekali aku turut mengikut berusah kawin di kampung ani zaman sepupuku kawin di Limbang tahun 2004. Luan tah batahnya sudah tu. Baru-baru ani awal bulan 7, adi mamaku kawin di kampung mama di Merapok, Lawas. Aku inda dapat kan pegi. Gagau banar ku dangan keraja ku. Muleh-muleh saja bapa dangan mama, bapa membawa muleh gambar-gambar urang berusah kawin atu. Siok ku meliat eh! Meriah banar nyamu!

Yang best pasal urang berusah kawin di Merapok ani, banyak tedapat aktiviti dibuatnya. Banar ni... siap ada jadual aktiviti ditulis dakat tiang di bawah teratak.


Ada tu nah, papan tulis putih tampat menulis aturcara majlis.


Nah! Siap ada betulis jadual waktu lagi tu...

Siapa sangka berusah kawin-kawinan di kampung ani ada macam-macam aktiviti & permainan. Aku pun tekajut nyamu meliat gambar bapa bawa ah. Gambar ani ku basari sebab kediaku pun kan meliat apa yang ditulis dangan ani.

Aturcara Majlis
Jumaat (Siang)
1. Simban - Terbuka
2. Mengupas Pinang - Terbuka L/P (Mahir/K. Mahir)
3. Gusti Lengan - (Perempuan dewasa/remaja)

Malam
1. Lagu 2 Ampus (apakan ni?) - Terbuka (Lelaki & Perempuan)
2. Zapin - (Lelaki)
3. Pakaian Beragam - (Perempuan Dewasa & Remaja)
4. Joget Rebut Kerusi - kanak-kanak, Lelaki dewasa & Remaja

Sabtu (Siang)
1. Melastik - (Kanak2) & Lelaki Dewasa
2. Membungkus Kelupis - (Lelaki Dewasa & Remaja)
3. Menjalin Kelupis - (Perempuan Dewasa & Remaja) 
4. Bowling Kelapa - (Lelaki & Perempuan Dewasa/Remaja)
5. Gubahan Bunga Hidup - (Lelaki Dewasa & Remaja)
6. Tarian P%@&# (inda nampak tulisannya ani. Sejenis tarian mengkali) - (Terbuka Dewasa & Remaja) (Kanak2 Terbuka)

Malam
1. Lagu2 Ampus - (Terbuka, Lelaki & Perempuan)
2. Ratu Kebaya - (Lelaki Dewasa & Remaja)
3. Twist - (Dewasa & Terbuka) (Apakah maksudnya terbuka ani lagi??)
4. Joget Rebut Kerusi - (Perempuan Dewasa & Remaja)

Siok ah progrem-progremnya. Inda kejumpahan tu bah kalau di bandar-bandar. Kalau di Kuching ani, aluuuum! Kediaku pun tekajut meliat aturcara nya ani. Kalau kan bekaraoke atu tau pulang ku tu. Ani ada siap pertandingan pakaian beragam tia, membungkus kelupis tia, bowling piasau tia, bejoget tia. Siap ada petandingan gubahan bunga lagi tu geng..!! Memang meriah banar nyamu. Rugi kediaku inda pigi. Biniku pun iski bah. 

Karang-karang tah dahulu kediaku menaruh gambar-gambar aktiviti-aktiviti majlis atu dalam ani. Luan betimbun. Mau dipilih yang bisai dulu. Baru siok dangan meliat.

PS:- Dalam semua aturcara majlis betulis atu, sebuting nganya ku inda tau. Apakan "LAGU2 AMPUS" ani kan???

Tuesday, July 24, 2007

Apple - iPhone (Bisai kah?)


Batah-batah Apple mengeluarkan iPod, banyak sudah urang membalinya. Sudah ada macam-macam jenis iPod dikeluarkan. iPod damit, iPod basar, iPod Click-Wheel, iPod Photo, iPhone Video, iPod Mini, iPod Shuffle, iPod Nano... macam-macam lagi eh iPod ani. Tapi, ada satu lagi jenis iPod yang lakat lagi orang di Asia tertunggu-tunggu kan keluar... iPhone!!!

Ramai urang makai iPod atau makai komputer Apple ani sudah tetunggu-tunggu kan meliat iPhone. Dalam www.apple.com malar sudah kana ceritai pasal iPhone ani. Di US sudah tia keluar. Cuma di Asia ani lambat sedikit. Bah, anitah ceritaku, kawan ku di ITFusion membawa balik iPhone dari US. Siok dorang kadai ani kan meliat dari dakat iPhone ani. Nya dorang best! Ada lah jua kediaku mengambil beberapa buting gambar iPhone ani. Dari luar bisai pulang eh.

Aku sampat kan menyubok jua di kadainya ani. Meliat kutaknya saja sudah best. Biasalah, kalau naendah Apple ani selalunya kutak-kutaknya bisai-bisai. Harganya pun selalunya "bisai-bisai" jua (macam harga naendah Apple ani sekali kira dangan harga kutaknya).

Bah, ani tah gambar iPhonenya. Ku takan saja power buttonnya sebalah atas kanan, "Activate iPhone" keluar siap ada gambar bumi. Ada slide button lagi betulis "slide for emergency" (kalau telepun pulis dapat mengkali.. emergency bah!). (Sayang eh, iPhone anu US version ani, balum lagi dapat dipakai di Asia). Atu tia lakat lagi betulis "Activate iPhone".

iPhone ani buleh diisi 4gb data dalamnya, warna hitam lagam di dapan. Dibelakangnya warna silver bekilat. Dalam kutaknya ada charger, iPhone dock (pakai menge"charge" atau pakai upload lagu guna iTunes) dangan sebuting earphone. Kutaknya ani pun andang bisai... tepakai ku eh!!

Anitah pasal iPhone ani. Sungguhnya kedia ani iPod + handphone, tapi ia punya badan, nipis sama macam iPod. Liat saja tah gambar aah, nipis nyaaa... tabal lagi aku punya Sony Ericsson W850i.

Di siringnya ani ada infra-red port dangan pengatik volume (up & down). iPhone ani, ada jua Bluetooth. Kalau inda silap Bluetooth 2.0. Di atasnya ada earphone port pakai mendangar guna earphone (macam iPod biasa).

iPhone ani macam-macam jua kebulehannya. Ada internet browser software lagi dalamnya siap ada Wifi lagi tu nyamu boy...! Ada widget-widget macam Calendar, Photo, Camera (built-in 2.0 mega pixel camera), You Tube, Clock, Notes, Maps... macam-macam lagi tah eh. Ngaleh jua ku kan madahakan semua. Bukannya apa, pasal kediaku inda dapat membuka iPhone ani. Balum dapat digunakan lagi. Bah, pindik kata, iPhone ani bukan setakat handphone. Ia jua iPod, web browser, photo gallery, diary, calendar, calculator, video player... macam-macam lagi. Bukan setakat atu nganya, kalau ketani kan meliat screen nya, dari arah menagak ke singit pun, screen pun mengikut jua. Ia tedapat sensor dalamnya. Siok kan...!! Dapat jua kan mengala-alakan dangan urang lain. Kalau ku tedapat iPhone ani, dapat jua ku mengambang arah dangan eh...!!! hihihi

Tapi sayang eh, iPhone ani balum lagi dapat digunakan di Asia. Harganya pun aku inda tau berapa pusen (indalah bepusen... labih dari RM2K jua tu kali). Bah.. karang kalau sudah keluar iPhone ani di Asia, jangan biskita salah bali eh. Ada jua di kadai bejual iPhone (klon) made in China. Nah.. liat tah ni...

Macam iPhone pulang rupanya. Tapi tulis cina

Tapi, kalau sasak usin inda tebali iPhone, "iPhone made in China" ani pun kira buleh ni. Indalah luan mahal iPhone original.. tebali jua mengkali eh... Mau kaa? Kalau kediaku atau mana-mana Macuser, mesti madahkan "malas tah ku ingau!!!!"

Sunday, July 22, 2007

Berusah Kawin-Kawinan

Asal cerita pasal urang kan kawin ani, andang selalu jadi isu hangat banar. Pasal persiapan tia, pasal belanja kawin tia, pasal tampat kan kawin tia... atau pasal kan mengatur majelis sebalah bini-bini dangan sebalah laki-laki. Kalau di Kuching ani, sudah menjadi kebiasaan kalau kan besanding di dewan atu, selalunya bekongsi majelis laki-laki sama bini-bini. Sanang keraja... sekali nganya! Batah sudah nyamu aku inda mendangar pasal cerita urang kan berusah kan kawin di Limbang atau pun berusah kawin style urang Brunei.

Yang ku dangar baru ani, ada tia urang ani kan kawin dangan urang balah-balah Labuan yang jua mengikut adat melayu Brunei (antah banar inda kah ku dangar ani). Tapi yang ku dangar, dangan ani kan kawin dangan bini-bini kan mengikut adat Brunei. Macam-macam tia di minta keluarga sebalah bini-bini ani. Ada tia karis, dulangan amas-amasan... segala kain-kainan... macam-macam eh! Sebalah laki-laki ani kalau buleh kan minta barang-barang ani di tabus guna usin saja, pasal payah kan mengunjar barang-barang atu. Tapi, balah bini-bini inda mau!

Paning-paning... mana inda sasak balah laki-laki ani. Barutah kan bekeraja tatap, sudah tia kan kana minta naendah-naendah "rare" yang mahal. Ada tia ku dangar jua dangan ani kana pintahi RM20K untuk usin hantaran. Aduuui, kepisan ku mendangar! Mana tah kan mengunjar usin banyak ani kan?

Kediaku pun heran urang karang ani. Asal kan kawin saja, macam-macam tia adat keluar. Kan minta ani, kan minta atu... dah laa inda mau kan ditabus guna usin. Sasak eh...! Kesian jua ku mendangar al-kisah dangan laki-laki ani. Mau inda mau, terpaksa tah jua mengunjar naendah atu. Kenapakan urang tetua karang ani? Inda kan paham kah konsep tulak-ansur? Kesian bah dorang kanak-kanak ani kan kawin. Payah-payahan beunjar usin, lapas atu berabis bepakai kan kawin. Bila dah kawin, berutang keliling pinggang kan mengelingai peranakan. Bagi makan minum pun payah-payahan... Kesian eh.


Belanja makan kawin pun bukannya murah. Besaprah-saprah kan di hidang.


Kan membuat pelamin pun bukannya murah karang ani.

Tepikir jua ku eh, baik tah beimat-imat belanja kawin ani. Hantaran barian atu sadang-sadang cukup ala kadar saja tia bah. Pasal usin belanja atu, cukup-cukup tah guna pakai kawin. Jangan tah boros kan bekaraoke atau kan melagau urang sampai beribu-ribu jelama. Kalau lagi dahulu, mungkin jua banar buleh kan minta barang adat yang bukan-bukan ani, pasal sanang mengunjar. Tapi karang ani, kan mengunjar karis pun, bukannya sanang. Di mana inda kah di Kuching ani bejual karis? Inda ku tetulus nyamu..!!

Kenapa ku karis ani. Bejurit saja tah naendah di rumah 

Yang calinya, urang tetua madahakan, naendah-naendah ani barang adat. Auu... banar tu. Aku inda jadi hal barang adat ani. Bukan kan melawan, tapi biar tah practical nya urang. Kalau jadi barian pun karis atu, kan pakai apa??? Lagi dahulu banar pulang tu beguna jadi alat mempertahankan diri. Tapi karang ani, kan dijadikan apa tah tu ya??? Kalau bari pistol beguna pulang kali dangan!! Bukan kan jadi urang karit betakang (nya urang kadayan). Tapi baik tah lojik apa yang diminta atu. Inda payah menyusahkan jelama lain. Kesian bah... Cubah tah kana pintahi microwave ka, TV ka atau hair dryer ka, sanang jua urang kan mengunjar. Indakan balah laki-laki madahakan ia inda mau membari karis atu (kalau ada option atu, mau jua kali madahakan nyamu eh...!). Masa-masa merisik-merisik ani, sebalah laki-laki au saja tu. Inda jua dangan dapat madahakan inda au. Semua au tu...!

Bah.. panjang sudah "kerepak" aku ani. Karang tah kediaku menyambung cerita pasal berusah kawin ani lagi. Ngaleh sudah ku ni kan memurancah (tidor) nyamu....

Saturday, July 21, 2007

Mengayau

Batahku be'blog' ani, indakan pandai kebisaian ku rasa blog ani. Bida hantap pelemaingku. Aku suka pulang warna gadong ani.. Nganya perasahanku ani macam sudah kelanguan. Kalas mengkali bisai banar..

Malam kelemarin, adaku mengayau, mengunjar blog urang lain. Bisai-bisai hantap blog urang. Iski ku meliat. Bah, karang tah ku mengusai blog ku ani. Inda teranah sudah Elisa tu nah.. Minta kana takul! Anipun aku betapok menaip pakai handphone. Kalau pakai laptopku, abis tia kana himbit Elisa..

Munjung tia mulutnya sudah. Aku rasa aku perlu Elmo's World!

Friday, July 20, 2007

Side Effect

Elmo's World

Mama selalu madahakan, kediaku ani lakat lagi suka kan meliat rancangan katun. 

Mama : Tua-tua pun lakat meliat katun?
Aku : Best bah katun.
Mama : Cerita kanak-kanak jua tu. Kau sudah tua. Adang tah...
Aku : Inda jua hal tu... Urang tetua jua membuat rancangan ani.
Mama : .........

Banyak urang tetua karang ani inda tau rancangan ani best. Bukan untuk kanak-kanak nganya. Urang tetua pun siok meliat ni. Rancangan Elmo's world ani main tiap pagi pukul 8.30 dalam ASTRO cenel 63. 

Apa jadi nah... kalau setiap pagi rancangan Elmo's world ani dipasang? Jeng-jeng-jeng.....


Elmo ditakulnya eh....

Ani tah ya "side effect" kalau meliat rancangan ani. Teranah tia anakku ah.... kan bagus!!

Wednesday, July 18, 2007

Ke Kanan, Memanjut!

"Sila Memandu Di Sebelah Kiri Jika Tidak Memotong". Balik-balik sudah urang madahakan, kalau inda memutong atu atau inda laju, pakai tah jeraya sebalah kiri. Banyak urang karang ani betingal. Masih jua lakat drebing atu sebalah kanan. Mun laju inda jua dahal.

Bah, liat saja tah gambar di atas ah, lori basar drebing sebalah kanan. Perasan memanjut banar kali drebarnya ni! Kediaku andang anti banar tah urang drebing sebalah kanan inda memutong. Dah lah yang ani lori basar. Buah tia.. ijap ku eh...!

Aku pun heran nyamu eh, kenapa tia kan jelama karang ani inda kan merati undang-undang jeraya? Kalau kan slow atu, jalan tah sebalah kiri bah... Ani ijapku meliat. Abak-abak urang kan memutong lori ani sebalah kiri.


Liat saja tah logo kelajuannya. 70km/j nganya tu.

Inda jua patut eh lori ani drebing sebalah kanan bah. Bukannya lori ani dapat laju. 70km/j nganya kana banarkan tu. Kalau atu nganya lajunya, bahapa tia makai jeraya sebalah kanan? Bah... untuk siapa-siapa balum parnah pigi ke Kuching, jangan heran meliat ani. Ani pemandangan yang biasa di Kuching ani.

Pengajaran
Jangan ingat ketani ani paling laju dijeraya. 
Ada lagi yang laju dari ketani... "especially" lori basar ani.
ijap urang kan menguyung!
Siapa-siapa kan "racing" di Kuching, racing tah dulu dangan lori ani!
Kana kantuti lori nganya kali..

Oooo... Kanak-Kanak!



Hari ani aku menerima email dari kawanku di Kuala Lumpur. Lagi dahulu masa kami lepak sama-sama (dulu aku belajar & keraja  di KL) kami selalu becerita pasal rancangan-rancangn TV dalam RTB. Kawanku ani bukan orang Brunei pulang eh. Kedia ani asalnya dari Marudi. Katanya, selaginya damit, rumah dorang dapat jua signal siaran RTB di sana. Kediaku jangan tah lagi. Kalau di Limbang, lagi tah tia tarang! Karang ani, inda tah ku tau. Batah-batah be"ASTRO" ani, tinggalam tia siaran-siaran TV lain. Paling teruk, time AF!

Kelanguan dah kediaku meliat rancangan ani.


Balik tah ketani cerita asal. Kawan ku ani email ngan kediaku lirik lagu "Oh! Kanak-Kanak". Ketawa jua ku eh meliat emailnya menyuruh kediaku menyambung liriknya. Inda abis ditulisnya. Inda ingat kali pakah. Bah, inda dahal tu. Ani tah lirik lagunya :-

Oh! Kanak-Kanak

Oh! Kanak-kanak
Apa kamu bawa
Talur dua biji
Mintaku sebiji

Marah karang nini
Kemana ninimu
Mengambil daun
Kenapa daun
Membuat balai
Kenapa balai

Tampat ber-aum-aum
Ambuyat semangkuk agung


Nah, atu tia liriknya. Kalau inda tau kan belagu lagunya (takut salah tiun), klik saja "play" tah di bawah ani. Lapas atu, belagu tah ketani sambil MENGALAI!!



Bah... kenapa beranti mengalai? Mengalai tah....!! (Minta maaf eh.. sound lagunya inda kuat. Thats the best I can get)

Apakan arti "AMBUYAT SEMANGKUK AGUNG" ani kan?

Tuesday, July 17, 2007

Pancit Tia Pulang...

Sehari-hari aku membuat keraja, turun-naik bejumpa urang di sana-sini kengalehan, ingatkan lapas ani buleh tah kan rilek-rilek di rumah. Sekali ku subok kerita ku paking diluar macam pancit tayar belakangnya.

Ku aga dakat-dakat banar jua nyamu eh. Pancit kampis hantap!! Bah.. makin tah ku ngaleh lagi ni eh. Dah hari hangat, baru pukul 5 patang... buleh angus bekarak ni kalau bejamur masa ani. Kunonnya kediaku kan menukar tayar ahir sedikit. Inda panas. Tapi kalau ku kerajakan ani, dapat ku antar ke kadai kan menampal sebalum kadai tutup pukul 6.

Ngaleh ku eh....

Monday, July 16, 2007

Handset $G

Selalu kalau keritaku paking siring kadai-kadai, ada saja keratas notis, iklan, kad-kad urang bedagang dikapit arah "wiper" kerita. Tapi selalunya, saman kerita kana taruh sana pasal kediaku selalu inda mengampaikan kupon paking di atas "dashboard" kerita.

Jangan inda tau, di Kuching ani kalau hari keraja, kan memaking kerita disiringan kadai, mesti be"kupon". Kalau inda, kana saman tia... macam kediaku selalu. Banyak tu kuleksen saman bandaraya Kuching arah ku. Warna-warni... jadi hiasan dalam laci keritaku.

Tapi baru-baru ani, ada urang mengapitkan iklan kadai amas ani arah kerita ku. Mula-mula atu, malas ku ingau kan membaca. Nampak biasa nganya kalau dibaca muka dapan iklan ani. Biasala ni urang kan bedagang pajak-gadai. Mana-mana urang sasak inda be-usin, pajakan saja tia amas atu ke kadai ani. Belurih jua usin tu.


Kan ku buang sudah iklan kadai amas ani tadi. Sekali ku liat dibelakangnya ada lagi kana tulis "Handset Boleh Menukar Wang". Banar ni kan???

Kalau dibaca camatu nganya, seulah-ulah handset pun dapat menukar usin (macam money changer di Boulevard, Miri). Sanang tu eh, bagi usin Brunei arah handset ani, dapat ditukarnya usin atu jadi usin Malaysia. Telipon kediaku masih balum ada "feature" ani lagi...!!! Feature apakan ni? WAP? 3G, 4G... ? $G mengkali??

Kalau banar tah ada telipun macam ani, sanang tu banar. Inda lagi ngaleh kan beunjar "money changer". Telepun saja, tarus dapat menukar usin. Jangan-jangan buleh menyunsung usin jua kali?

Aku rasa, urang membuat iklan ani main antam saja kali menulis ani. Apa inda kah dipikirnya..??

Bila Sudah Amai...

Bila boring-boring, start tah kediaku membuka galeri gambar dalam laptopku ani. Lapas atu, teliat tah ku gambar-gambar yang aku rasa macam inda paidah kan disimpan. Bah, liat tah ni...

Aku pun inda tau siapa punya hamster ani.


Di ampaikan atas mija lagi tu. Kan disuruh benanang dalam teh kali pakah?


Yang sekong ani ku rasa macam kana paksa menyincau dinding. Merati jua kali ya eh?


Kesian jua bila meliat gambar-gambar ani. Macam kana dera saja hamster ani. Kanak-kanak bemain ani kurasa. Sudah tah amai tangan merusahkan kamera ani, hamster pun di ulun dorang kan mengambil gambar kunun-kununnya, model. Aku rasa, luan kana ulun saja, ampus jua hamster ani. Liat saja tah gambar bawah ani:-


Nah... banar jua. Ayong tia hamsternya ani...


Bayangkan hamster atu, kerabau. Aku rasa kepisan jua kerabau atu oleh kanak-kanak amai. Bah, kenapa aku tah gambar ani disimpan? Baik tah ku delete saja....

Balik-balik jua!




Kalau cerita pasal helikopta ani, inda tah ada cerita lain. Cerita tegugur nganya. Kalau bekurapak dalam bahasa Sarawak, urang Kuching madah "Ndak alah-alah". Tapi kalau inda tegugur, inda tia jua glamer! Bah, ani tah cerita tebaru helikopta Nuri ani. Malam tadi cerita dalam Buletin Utama (TV3), yang ani dalam Utusan Malaysia.

Lapas aku membaca berita ani, teringin jua kediaku kan meliat dalam wikipedia, apa cerita pasal helikopter ani. 

Ani tah gambar helikoptanya. Inda jua bisai banar usulnya.

Sekali, lapas diunjar dalam wikipedia, ada tia kejumpahan cerita cali. Liat saja tah ani...


Anitah yang calinya. Urang Kanada siap membuat lagu tema lagi pasal helikopta ani. Yang calinya, lagu ani cerita pasal tegugur. Mana inda Nuri di Malaysia malar tegugur. Malaysia pun ku rasa patut membuat lagu tema jua mengkali. Bah, adang tah kan membali helikopta macam ani lagi... abis saja "Si Awang Usin" membali.

Aku rasa Lagu Tema helikopta ani start dari Chord "D minor". Baru sedih bunyinya sikit!

Ketaguran

Selalu urang tetua madahakan, kalau inda menuruti cakap dorang, apa-apa jadi yang inda baik lapas atu kana ucapkan "ketaguran". Camanakan konsep "ketaguran" ani? Bila time nya ketaguran ani mulakan? Lapas tekana atau sebalum? Apa sebanarnya artinya kan?

Kalau ku pikir panjang-panjang lagi, selahau jua karang utak ku ani. Tapi kalau ku tanyakan dangan urang lain, kana ucapkan bibiran tia pulang.

Saturday, July 14, 2007

Mengunjar Makan Di Kuching

Pasal makan ani selalu aku dangan biniku tefikir dimana lagi di Kuching ani tampat best makan. Kalau masa makan tangahari, selalu jadi masaalah. Mana inda, bila ku tanyakan biniku dimana kan makan, selalunya jawapnya "Mana-mana ajak". Ani tah yang selalu paning befikir... indakan balik-balik ke tampat kami selalu makan. Bukan apa, mau jua ketani ani betukar selera kan....

Aku selalu membawa biniku ke Didi restoran di Satok. Inda jualah kan di padahakan paling nyaman, tapi makanannya banyak choice. Kadai ani mengidang cara buffet nyamu. Macam-macam ada. Sabut saja makanan yang biasa ada di Kuching ani, selalunya semua ada. Nganya jadi masalah kediaku ani, bila sampai di dapan kaunter kan memilih makanan, palak-palak saja mata ku meliat inda tau kan memilih yang mana satu kan ku makan. Kan ambil banyak... inda temakan saja karang (jangan temaha!!).

Aku ingat lagi selagiku damit dulu, asal makan tangahari, ada tia mama (mun inda mulah nini bini) mengarek menyuruh makan. Antahlah, asal kanak-kanak ani, payah tah disuruh makan. Belusiran tia sana sini betapok... takut kana marahi. Ada jua masanya mulah nini laki mangarek kan makan, be-uyungan tah kami (sama dangan pupu-pupu ku yang lain) kan betapok, takut kana marahi inda mau makan. Antahlah, apakah yang difikirkan masa atu sampai inda makan. Kan kata kanyang, inda jua. Sampai karang ani pun aku inda paham.

Yang calinya, karang ani bila dah tua, asal kelaparan saja, indakan tetunggu kan makan. Anitah yang sebanarnya kan ku ceritakan. Malam tadi aku kelaparan. Sehari-hari aku inda makan. Jangan kata breakfast, lunch pun aku inda makan. Inda sampat, keraja betimbun. Jadi bila sampai malam... sakit parut kelaparan.

Jadi Malam tadi kubawa peranakku makan di Arif Cafe. Andang bejurit urang disana. Kan cari paking pun payah. Atu semua inda jadi masaalah. Parut sudah lapar kan makan sup tulang Arif Cafe. Banyak urang Kuching inda tau, sup-sup di jual di kadai Arif Cafe ani andang nyamaaaaaaan banar nyamu!!! Kalau urang semenanjung madahakan... kaw-kaw!


Bukan atu saja, kadai ani ada "Wifi Access" free!!! Kawanku Yuri, tuan kadai Arif yang masang. 

Yuri: "sikda hal pasang free. Mun sapa-sapa nak makey, pakey jak la". 

Best jua tu..! Free nyamu!! Mana lagi kan dapat barang free cam ani? Tapikan, mun ditanya kediaku, aku suka lagi "makan free"... hihihi.

Friday, July 13, 2007

Hyundai, angus!!

Sehari sabtu minggu lapas, kediaku anak-beranak kan muleh baru mengambil adi ipar ku dari Satok, Kuching. Lalu tah kediaku di jalan Rock Road. Masa atu ku teliat asap itam terabang jauh di dapan. Ku pikir urang menunu mayat dakat dangan kubur cina sebalah GH Kuching.

Ku padahkan biniku, tapi katanya inda patut jua urang menunu mayat di dalam bandar. Angus mengkali?? Kan sampai ke tampat angus ani andang lambat. Jeraya jem nya mu. Panjang kereta betuntun bebaris. Kediaku ani pun ada jua rasa kan meliat apa yang angus. Mula-mula ku pikir Court Mammoth. Biasanya kediaku ani inda jua kan gagau-gagau meliat kejadian yang jarang-jarang belaku ani. Cuma alang-alang kan mengampiti cerita terbaru, baik tah meliat jua. Ada jua kan diceritakan dangan urang.

Sekali sampai tampat angus atu... banar jua... basar apinya nyamu. Apa lagi, menangkap gambar tah ku. Ramai urang meliat banar. Bejurit urang di kadai siring-siring meliat macam pesta rakit di Limbang. Punduk-punduk tah urang meliat macam urang baru-baruan.

Ku dangar dalam surat kabar madahakan yang urang punya kadai ani rugi sampai RM1juta. Banyak jua tu. Mun bari kedia ku, berumah basar tia sudahku. Tapi yang calinya di Kuching ani, asal ada benda macam ani temasuklah accident, mestilah ramai urang beranti meliat di siring-siring. kalau kan menulung lain lah cerita. Ani, punduk-punduk nganya. Apakah yang kan diliat dorang ani yang sebanarnya? Api kah atau nganya kan ampit-ampit kana gambar reporter masuk newspaper mengkali? Mengintu kan jadi glamer tu!!

Kediaku dengan Elisa Ayuni


Dalam banyak barang yang ku buat dalam blog ani, banyak yang inda jadi. Kan menaruh gambar dalam profile pun aku inda merati. Berapa kali sudah ku cuba, inda jua jadi. Heran jua eh.

Ada jua urang mengajar kediaku membuatnya, tapi inda jua jadi-jadinya. Betingal kali banar??? Antahlah. Alang-alang inda menjadi, baik tah ku post saja gambar ku di sini ani. Atleast, nya urang, ada jua kan di ala-alakan. Karang kana ucapkan saja kan ber"blog", tapi inda pandai kan configure profile.

Ani tah gambar anakku nah. Basar tia sudah. Ramai urang betanya kediaku kan gambarnya terbaru. Tapi Gambarnya banyak inda bisai. Ya tah ni, mun alang-alang kan mengala-alakan, biar tah yang bisai sedikit. Kan mengambil gambar bisai banar inda jua ku tetulus tu. Bukan pro kediaku ani kan mengambar. 

Yang banarnya, gambarku sendiri selalunya inda ku tedapat. Ada pun inda supan rupanya. Kediaku ani, daripada sia-siapun inda ada begambar di dalam blog ani, baik tah ku post saja yang ter lawa, nya urang. Tunggu tah aku pemandai dulu membuat blog ani banar-banar, baru kebisaian urang kan meliat. Karang harap-harap saja urang kan meliat.. tapi doooii... inda jua bisai banar nya mu....

Kurising-kurising

Aku inda jua merati banar pasal blogging ani sebanarnya. Kurising-kurising ku befikir apakan dulu ku tulis. Biniku membari tau, baik tah aku menulis dalam bahasa Limbang atau bahasa Sarawak. Lapas ku befikir, baik tah aku bercerita dalam bahasa ku sendiri (bahasa Limbang) atau yang sebanarnya bahasa Brunei.

Batah sudah aku inda becakap bahasa ani sebanarnya. Mun dirumah, bahasa Sarawak nganya ku pakai. Bila muleh ke rumah bapa di Semenggok, Kuching, baru tah aku bekurapak Limbang. Atu pun aku kadang-kadang pandai tersasul becakap bahasa Sarawak. Atu tah nyamu ani, batah inda dipakai, jadi tah bahasa rujak.

Mun lagi dahulu, buleh tah aku bekurapak bahasa Limbang fluent. Ani inda tia lagi. Mesti ada yang bercampur-campur. Originality atu inda lagi ada bah. Kadang-kadang peranakku sendiri ketawa mendangar. Mana inda, bahasa Limbang dicampur dengan bahasa Sarawak. Jadi tah bahasa buatan sendiri atau buleh di namakan macam bahasa "fusion". Atu tia cali meliat muka urang-urang keliling aku mendangar aku becakap. Masing-masing tetuleh-tuleh mendangar aku bekurapak. Aku merati pulang apa kan ku maksudkan. Tapi urang lain... macam memantul nganya subject yang ku ceritakan... inda tah merati tu mengkali (pelemaing ku).

Bah.. inda merati pun inda ngapa. Memandangkan ani kali pertama aku post dalam ani, jadi inda dahal mun siapa-siapa saja yang "cuba" membaca ani inda paham. Lain kali, buleh lagi tu. Setakat ani, aku pun inda tau apa kan ku ceritakan dalam blog ani. Biar tah kali dulu. Nunggu idea datang, baru tah aku becerita lagi. Lakat tah lagi aku tepunduk-punduk di sini bepikir apakan lagi ditulis dalam blog ani.